Girish Mahajan Photo Controversy: भाजपचे संकटमोचक आणि राज्याचे कॅबिनेट मंत्री गिरीश महाजन यांचे एका तरुणीसोबतचे काही वादग्रस्त फोटो सोशल मीडियावर व्हायरल होत आहे. या फोटोंमुळे महाराष्ट्राच्या राजकीय वर्तुळात अचानक खळबळ उडाली आहे. मात्र, प्राथमिक पाहणीत हे फोटो कृत्रिम बुद्धिमत्ता म्हणजेच एआय (AI) तंत्रज्ञानाचा वापर करून तयार करण्यात आल्याचा संशय समोर आल्याने या प्रकरणाला वेगळे वळण मिळाले आहे.
मंत्री महाजन यांची जाणीवपूर्वक बदनामी करण्यासाठी हे बनावट फोटो तयार करून ते पसरवले गेल्याचा आरोप झाला आहे. याप्रकरणी जळगाव येथील सायबर पोलीस ठाण्यात अधिकृतपणे गुन्हा दाखल करण्यात आला असून पोलीस आता या प्रकरणाच्या पाळामुळांचा शोध घेत आहेत.
फेसबुक अकाऊंट रडारवर; ‘या’ कलमांनुसार गुन्ह्याची नोंद
या सायबर गुन्ह्याबाबत पोलिसांनी दिलेल्या माहितीनुसार, तपासाची चक्रे वेगाने फिरत आहेत:
- मॉर्फिंगचा संशय: एका विशिष्ट फेसबुक खात्यावरून गिरीश महाजन यांचे एआय तंत्रज्ञानाच्या मदतीने तयार केलेले किंवा मॉर्फ केलेले फोटो वापरून आक्षेपार्ह पोस्ट शेअर करण्यात आली होती.
- कडक कायदेशीर कलमे: या प्रकरणी दाखल झालेल्या तक्रारीवरून पोलिसांनी भारतीय न्याय संहितेचे कलम 356, 3 (5) आणि माहिती तंत्रज्ञान कायद्यातील (IT Act) कलम 66 (C) व 67 अंतर्गत गुन्हा नोंदवला आहे.
- मूळ स्रोताचा शोध सुरू: पोलीस निरीक्षक सतीश गोरडे यांच्या मार्गदर्शनाखाली सायबर पथक डिजिटल पुरावे गोळा करत असून, या पोस्टचा मुख्य सूत्रधार कोण आहे आणि हे जाळे कुठपर्यंत पसरले आहे, याचा तांत्रिक तपास केला जात आहे.
राजकीय वातावरण तापले; लवकरच सविस्तर खुलासा करणार: महाजन
या प्रकरणाचे थेट पडसाद राज्याच्या राजकारणावर उमटताना दिसत आहेत. विरोधी पक्षातील काही नेत्यांनी आणि कार्यकर्त्यांनी हे फोटो सोशल मीडियावर शेअर करत मंत्री महाजन यांच्यावर जोरदार टीका करण्यास सुरुवात केली .
दुसऱ्या बाजूला, मंत्री गिरीश महाजन यांनी स्वतः यावर अत्यंत आक्रमक भूमिका घेतली आहे. त्यांनी पोलिसांत अधिकृत तक्रार दिली असून या संपूर्ण प्रकरणाची सखोल चौकशी करण्याची मागणी केली आहे. पत्रकारांशी बोलताना महाजन म्हणाले की, “या तपासातून लवकरच दूध का दूध आणि पाणी का पाणी होईल. सत्य समोर आल्यानंतर मी स्वतः या संपूर्ण प्रकरणावर सविस्तर आणि जाहीर खुलासा करेन.”
हे फोटो कसे मॉर्फ करण्यात आले मला माहिती नाही . मी याबाबत सविस्तर खुलासा करणार आहे. मी मुंबई पोलिसांकडे तक्रार केली आहे. फोटो मॉर्फिंग करुन ते दाखवले जात आहेत. सेल्फी दाखवले जात आहेत. पण ते मॉर्फिंग केलेले आहेत. मी यासंदर्भात सखोल चौकशी करण्याची मागणी केली आहे. मी यावर सविस्तर खुलासा करेन, असे गिरीश महाजन यांनी सांगितले.
एआयचा गैरवापर आणि सायबर पोलिसांचे नागरिकांना आवाहन
सध्याच्या काळात आर्टिफिशिअल इंटेलिजन्स (AI) आणि डीपफेक तंत्रज्ञानाचा गैरवापर करून व्हीआयपी व्यक्तींची प्रतिमा मलिन करण्याचे प्रकार वाढताना दिसत आहेत, ज्याबद्दल सायबर तज्ज्ञांनी चिंता व्यक्त केली आहे. नागरिकांनी सोशल मीडियावर येणारे कोणतेही संशयास्पद फोटो किंवा माहितीची शहानिशा केल्याशिवाय ती पुढे फॉरवर्ड करू नये, असे आवाहन सायबर पोलिसांनी केले आहे.
