iPhone 18 Pro Price: अॅपल कंपनीच्या नवीन आयफोनच्या लाँचिंगला अजून जवळपास दोन महिने बाकी आहेत, मात्र त्यापूर्वीच आयफोन खरेदी करू इच्छिणाऱ्या ग्राहकांसाठी एक मोठी चिंतेची बातमी समोर आली आहे. सुरुवातीला असे मानले जात होते की अॅपल यावर्षी किमतींवर नियंत्रण ठेवेल.
परंतु, कंपनीने नुकतीच आपल्या मॅकबुक आणि आयपॅडच्या किमतीत मोठी वाढ केल्यामुळे आता बाजारातील तज्ज्ञांचा अंदाज पूर्णपणे बदलला आहे. विश्लेषकांच्या मते, आगामी आयफोन 18 प्रो आणि आयफोन 18 प्रो मॅक्स या प्रीमियम मॉडेल्सच्या किमतीत यावेळेस मोठी वाढ पाहायला मिळू शकते.
अॅपल दरवर्षीप्रमाणे यंदाही सप्टेंबर महिन्यात आपल्या भव्य इव्हेंटमध्ये या नवीन फ्लॅगशिप सीरिजचे अनावरण करण्याची शक्यता आहे. कंपनीने अद्याप अधिकृत किमती जाहीर केल्या नसली, तरी जागतिक बाजारपेठेतील काही घटकांच्या वाढत्या खर्चामुळे हा निर्णय घेतला जाऊ शकतो.
किंमत थेट २०० डॉलर्सने वाढणार; तज्ज्ञांचा नवा दावा
अॅनालिटिक्स फर्म ‘आयडीसी’च्या (IDC) मते, आयफोन 18 प्रो मॉडेल्स आपल्या जुन्या मॉडेलच्या तुलनेत तब्बल 200 डॉलर्सपर्यंत महाग होऊ शकतात.
या किंमत वाढीची मुख्य गणिते खालीलप्रमाणे आहेत:
- पूर्वीचा आणि आताचा अंदाज: आयडीसीने आधी प्रो मॉडेल्सवर 100 डॉलर्स आणि सामान्य मॉडेलवर 50 डॉलर्स वाढतील असा अंदाज लावला होता. मात्र, अॅपलने काही आयपॅड आणि मॅकच्या किमती थेट 300 डॉलर्सने वाढवल्यामुळे आयफोनच्या किमतीही अपेक्षेपेक्षा जास्त वाढतील, असे आयडीसीच्या वरिष्ठ संचालक नबिला पोपल यांनी स्पष्ट केले आहे. त्यांच्या मते, आता ५० डॉलर्स किंमत वाढण्याचे दिवस संपले आहेत.
- अमेरिकेतील अंदाजित किंमत: या अंदाजानुसार, अमेरिकेत आयफोन 18 प्रो ची सुरुवाती कींमत 1,249 ते 1,299 डॉलर्स आणि आयफोन 18 प्रो मॅक्सची किंमत 1,349 ते 1,399 डॉलर्सच्या दरम्यान असू शकते.
पाच आकडी वाढीसह भारतीय ग्राहकांचा खिसा रिकामा होणार
जागतिक बाजारपेठेतील या दरवाढीचा सर्वात मोठा फटका भारतीय ग्राहकांना बसणार आहे, कारण भारतात अॅपलची उत्पादने अमेरिकेपेक्षा आधीच खूप महाग असतात. आयडीसी इंडियाचे उपाध्यक्ष नवकेंदार सिंग यांच्या मते, भारतात आयफोन 18 प्रो आणि प्रो मॅक्सच्या किमतीत जुन्या मॉडेल्सच्या लाँचिंग प्राईसच्या तुलनेत सुमारे 9,500 रुपयांपासून ते 14,200 रुपयांपर्यंतची थेट वाढ होऊ शकते.
जर अॅपलने ही रणनीती लागू केली, तर भारतातील किमतींचे चित्र असे असेल:
- iPhone 18 Pro: हा फोन भारतातील आयफोन 17 प्रो च्या 1,34,900 रुपये या लाँचिंग किमतीपेक्षा खूप जास्त किमतीत बाजारात येईल.
- iPhone 18 Pro Max: या टॉप मॉडेलची किंमत आता 1,49,900 रुपयांच्या मर्यादेला ओलांडून खूप पुढे जाण्याची शक्यता आहे.
किंमत वाढीचे मुख्य कारण काय?
या प्रचंड किंमत वाढीमागे जागतिक स्तरावर निर्माण झालेली मेमरी चिप्सची टंचाई कारणीभूत असल्याचे सांगितले जात आहे. यामुळे रॅम (RAM) आणि स्टोअरेज चिप्सच्या किमती मोठ्या प्रमाणावर वाढल्या आहेत. आगामी आयफोन 18 प्रो मॉडेल्समध्ये शक्तिशाली 12GB रॅम मिळण्याची शक्यता आहे. अॅपलने अशाच प्रकारच्या मेमरी कॉन्फिगरेशन असलेल्या नवीन आयपॅडच्या किमती आधीच वाढवल्या आहेत, त्यामुळे हाच पॅटर्न आयफोनसाठीही लागू होईल हे स्पष्ट आहे.
असे असले तरी, या किंमत वाढीमुळे आयफोनच्या मागणीवर फारसा परिणाम होणार नाही, कारण जुने आयफोन वापरणारे युजर्स अॅपलच्या नवीन एआय (AI) युक्त सिरी फीचर्सचा वापर करण्यासाठी फोन अपग्रेड करतील. यासोबतच, अॅपल या सीरिजमध्ये आपला पहिला फोल्डेबल आयफोन देखील लाँच करू शकते, ज्याची किंमत 2,500 डॉलर्सपासून (सुमारे ३,००० डॉलर्सपर्यंत) सुरू होण्याची शक्यता आहे. या सर्व चर्चा सध्या विश्लेषकांच्या अंदाजावर आधारित असून, अंतिम किमती सप्टेंबरच्या पहिल्या आठवड्यात होणाऱ्या अधिकृत लाँचिंगनंतरच स्पष्ट होतील.
