Sindhudurg Resort Accident: कोकणात फिरण्यासाठी गेलेल्या पर्यटकांच्या एका गटावर निसर्गाने नाही, तर एका दुर्दैवी अपघाताने काळाचा घाला घातला आहे. सिंधुदुर्ग जिल्ह्यातील मालवण येथील एका नामांकित रिसॉर्टमध्ये कोल्हापूरच्या एका 25 वर्षीय तरुणाचा स्विमिंग पूलमध्ये बुडून अत्यंत दुर्दैवी मृत्यू झाला.
श्रेनिक टाकळे (रा. कसबा सांगाव, ता. कागल, जि. कोल्हापूर) असे या मृत पावलेल्या युवकाचे नाव आहे. या धक्कादायक घटनेचा थरारक व्हिडिओ सध्या सोशल मीडियावर मोठ्या प्रमाणावर व्हायरल होत असून, पर्यटन करताना सुरक्षेची काळजी घेण्याचे आवाहन केले जात आहे.
मृत श्रेनिक हा त्याच्या 9 मित्रांसह मुंबईपासून साधारण 500 किमी अंतरावर असलेल्या मालवण परिसरात सुट्ट्यांचा आनंद घेण्यासाठी गेला होता. हा सर्व मित्रांचा ग्रुप 20 जून रोजी दुपारी 4 ते 5 च्या सुमारास मालवण येथे पोहोचला होता. तिथल्या ‘मालवणी पाहुणचार रेस्टॉरंट अँड रिसॉर्ट’ या होमस्टेमध्ये त्यांनी मुक्काम ठोकला होता. मात्र, दुसऱ्याच दिवशी म्हणजेच 21 जून रोजी दुपारच्या जेवणानंतर साधारण 3 वाजता ही काळीज हेलावून टाकणारी घटना घडली.
मित्रांसोबत खेळताना घडली दुर्घटना
रिसॉर्टमधील स्विमिंग पूलच्या परिसरात सर्व मित्र एकत्र जमले होते आणि गाण्यांच्या तालावर पाण्यात खेळण्यात दंग होते. याच दरम्यान:
- पुलामध्ये मारली उडी: मज्जा-मस्ती करत असताना श्रेनिकने अचानक स्विमिंग पूलमध्ये उडी मारली. या पुलाची खोली साधारण 4 ते 4.5 फूट इतकी होती.
- मित्र धावले मदतीला: उडी मारल्यानंतर श्रेनिक बऱ्याच वेळेपर्यंत पाण्याच्या वर आलाच नाही. हे पाहून तिथे उपस्थित असलेल्या त्याच्या मित्रांच्या लक्षात काहीतरी गडबड असल्याचे आले. त्यांनी तात्काळ पाण्यात धाव घेतली.
- रुग्णालयात नेण्यापूर्वीच मृत्यू: मित्रांनी त्याला तातडीने पाण्यातून बाहेर काढले, मात्र तोपर्यंत तो बेशुद्ध झाला होता. त्याला तातडीने मालवण येथील ग्रामीण रुग्णालयात उपचारासाठी हलवण्यात आले. परंतु, तिथे पोहोचण्यापूर्वीच त्याचा मृत्यू झाला होता, डॉक्टरांनी त्याला दाखल करण्यापूर्वीच मृत घोषित केले.
घातपाताचा संशय नाही; पोलिसांचा तपास सुरू
प्राथमिक अंदाजानुसार, पाण्यात श्वास गुदमरल्यामुळेच या तरुणाचा मृत्यू झाला असावा. मालवण पोलीस ठाण्यातील अधिकाऱ्यांनी दिलेल्या माहितीनुसार, या संपूर्ण घटनेत सध्यातरी कोणताही संशयास्पद प्रकार किंवा घातपात असल्याचा संशय आढळलेला नाही.
पोलिसांनी सध्या या प्रकरणी आकस्मिक मृत्यूची नोंद केली असून, घटनेच्या मूळ कारणाचा शोध घेण्यासाठी पुढील कायदेशीर तपास सुरू केला आहे. मृतदेह शवविच्छेदनासाठी पाठवण्यात आला असून, अंतिम वैद्यकीय अहवाल समोर आल्यानंतरच मृत्यूचे नेमके तांत्रिक कारण स्पष्ट होईल. या घटनेमुळे कोल्हापूरच्या कसबा सांगाव परिसरावर शोककळा पसरली आहे.
