IND vs ENG ODI Series : इंग्लंड दौऱ्यावरील टी-20 फॉरमॅटमध्ये भारतीय संघाचा खेळ पूर्णपणे विस्कळीत झाला होता. यजमान संघाने टीम इंडियाचा 0-4 असा धुव्वा उडवत मालिका खिशात घातली. मात्र, क्रिकेटच्या सर्वात छोट्या फॉरमॅटमधील हा पराभव विसरून भारतीय संघ आता पूर्णपणे नव्या रणनीतीसह मैदानात उतरत आहे. दोन्ही देशांमधील 3 सामन्यांची एकदिवसीय मालिका आता सुरू होत आहे.
या मालिकेचे सर्वात मोठे वैशिष्ट्य म्हणजे भारताचे दोन सर्वात अनुभवी आधारस्तंभ, रोहित शर्मा आणि विराट कोहली पुन्हा एकदा एकत्र खेळताना दिसणार आहेत. टी-20 आंतरराष्ट्रीय क्रिकेटला अलविदा केल्यानंतर हे दोन्ही दिग्गज आता केवळ वनडे आणि टेस्ट क्रिकेटवर लक्ष केंद्रित करत आहेत. त्यामुळे भारतीय संघाची घसरलेली गाडी रुळावर आणण्यासाठी हे दोन अनुभवी खेळाडू कशी कामगिरी करतात, याकडे जगाचे लक्ष लागले आहे.
14 जुलैपासून एकदिवसीय रणसंग्राम; विराट कोहलीची मैदानावर दमदार एन्ट्री
भारत आणि इंग्लंड यांच्यातील हा हाय-व्होल्टेज एकदिवसीय सामना 14 जुलैपासून खेळवला जाईल. विशेष म्हणजे, आयपीएल 2026 संपल्यानंतर विराट कोहली पहिल्यांदाच भारताच्या निळ्या जर्सीमध्ये आंतरराष्ट्रीय सामना खेळण्यासाठी मैदानात उतरेल.
यापूर्वी झालेल्या अफगाणिस्तानविरुद्धच्या एकदिवसीय मालिकेत रोहित शर्माने सहभाग घेतला होता, परंतु फिटनेसच्या कारणास्तव विराट कोहलीला विश्रांती देण्यात आली होती. आता विश्रांतीनंतर पूर्णपणे फ्रेश होऊन विराट कोहली इंग्लंडच्या गोलंदाजांचा सामना करण्यासाठी सज्ज झाला आहे.
IND vs ENG एकदिवसीय मालिकेचे मैदान आणि वेळ
भारतीय वेळेनुसार हे तिन्ही सामने दुपारी आणि संध्याकाळच्या सत्रात खेळवले जातील:
- 14 जुलै (पहिली वनडे): बर्मिंगहॅम येथे दुपारी 3:30 वाजता.
- 16 जुलै (दुसरी वनडे): कार्डिफ येथे संध्याकाळी 5:30 वाजता.
- 19 जुलै (तिसरी वनडे): ऐतिहासिक लॉर्ड्स (लंडन) मैदानावर दुपारी 3:30 वाजता.
युवा आणि सिनीअर खेळाडूंचा मेळ; असे आहेत दोन्ही संघ
या मालिकेसाठी भारतीय संघाची कमान युवा खेळाडू शुभमन गिलकडे सोपवण्यात आली असून श्रेयस अय्यर उपकर्णधाराची भूमिका बजावेल:
भारतीय क्रिकेट संघ: शुभमन गिल (कर्णधार), रोहित शर्मा, विराट कोहली, श्रेयस अय्यर (उपकर्णधार), केएल राहुल (यष्टीरक्षक), इशान किशन (यष्टीरक्षक), वॉशिंग्टन सुंदर, अक्षर पटेल, कुलदीप यादव, जसप्रीत बुमराह, प्रसिद्ध कृष्णा, हर्षित राणा, अर्शदीप सिंग, गुरनूर ब्रार, शिवम दुबे.
इंग्लंड क्रिकेट संघ: हॅरी ब्रूक, बेन डकेट, जो रूट, जॅकोब बेथेल, जेम्स कोल्स, विल जॅक्स, रेहान अहमद, गस ॲटकिन्सन, सॅम करन, लियाम डॉसन, टॉम बँटन, जोस बटलर, जोफ्रा आर्चर, साकिब महमूद, आदिल रशीद, जोश टंग.
