EPFO Centralised Portal: भविष्य निर्वाह निधी म्हणजेच पीएफचे पैसे काढण्यासाठी आठवडेभर वाट पाहणाऱ्या आणि खात्यातील रक्कम तपासण्यासाठी ईपीएफओच्या वेगवेगळ्या वेबसाईट्सवर चकरा मारणाऱ्या नोकरदारांना आता मोठा दिलासा मिळणार आहे. कर्मचारी भविष्य निर्वाह निधी संघटनेने (EPFO) एक अत्यंत प्रगत आणि नवीन सेंट्रल पोर्टल (केंद्रीय पोर्टल) बाजारात आणले आहे. या नवीन सुविधीमुळे कोट्यवधी नोकरदारांना जलद क्लेम सेटलमेंट, सोपी प्रक्रीया आणि पारदर्शक कामाचा अनुभव मिळणार आहे.
ब्लॅकआउट कालावधी संपल्यानंतर चालू आठवड्यात हे नवीन पोर्टल पूर्ण क्षमतेने देशभरात कार्यरत केले जात आहे. या संपूर्ण प्रणालीचे ऑटोमेशन म्हणजेच संगणकीकरण करण्यात आले असून, मानवी हस्तक्षेपाची गरज कमी झाल्यामुळे पीएफचे काम रखडण्याची समस्या आता दूर होणार आहे.
सर्व सेवांसाठी आता एकच खिडकी; जुनी विकेंद्रित व्यवस्था बंद
ईपीएफओने आपल्या जुन्या कार्यपद्धतीत मूळ धरलेला बदल करत एकात्मिक डिजिटल प्रणाली लागू केली आहे:
- एकाच ठिकाणी सर्व माहिती: युनिफाइड मेंबर पोर्टलवर लॉगिन केल्यानंतर युजर्सना पीएफ शिल्लक तपासणे, पैशांच्या दाव्याचा मागोवा घेणे आणि ईपीएफओशी संबंधित सर्व सेवा एकाच छताखाली मिळतील. पूर्वी ग्राहकांना वेगवेगळ्या कामांसाठी वेगवेगळ्या वेबसाईट्सवर जावे लागायचे.
- देशभरातून कुठेही काम: याआधी प्रत्येक प्रादेशिक कार्यालयाचे काम स्वतंत्र चालायचे. त्यामुळे ज्या कार्यालयात खाते असायचे, तिथूनच क्लेम पास व्हावा लागायचा. आता नवीन केंद्रीय व्यवस्थेमुळे देशातील कोणत्याही भागातील ईपीएफओ कार्यालय तुमच्या अर्जावर प्रक्रिया करू शकणार आहे. यामुळे वेळेची मोठी बचत होईल.
पीएफ क्लेम रिजेक्ट होण्याचे प्रमाण होणार कमी
या डिजिटल सुधारणेचा सर्वात मोठा फायदा म्हणजे पैशांचे दावे फेटाळले जाण्याचे (क्लेम रिजेक्शन) प्रमाण लक्षणीयरीत्या कमी होणार आहे. नवीन पोर्टलवर अर्ज करतानाच वेगवेगळ्या दाव्यांसाठी आवश्यक असणाऱ्या अटी व नियमांची माहिती स्पष्टपणे समोर दिसेल. यामुळे अर्जदार आपली पात्रता तपासूनच अचूक माहिती भरू शकतील, ज्यामुळे कागदपत्रांमधील त्रुटींमुळे अर्ज फेटाळला जाण्याचा धोका संपेल.
३४ कोटींहून अधिक खात्यांमध्ये १.४४ लाख कोटींचे व्याज जमा होणार
या नवीन केंद्रीय प्रणालीचा वापर आर्थिक वर्ष 2025-26 चे व्याज खात्यात जमा करण्यासाठी आधीच सुरू करण्यात आला आहे. ईपीएफओने दिलेल्या माहितीनुसार, सध्या क्षेत्रीय स्तरावर अंतिम पडताळणीचे काम युद्धपातळीवर सुरू असून ते पुढील 2 दिवसांत पूर्ण होईल.
पडताळणी संपताच पुढील आठवड्याभरात देशातील 34 कोटींपेक्षा जास्त सदस्यांच्या खात्यांमध्ये एकूण 1.44 लाख कोटी रुपयांपेक्षा अधिक व्याजाची रक्कम जमा केली जाणार आहे. पुढील वर्षापासून ही व्याज जमा करण्याची संपूर्ण प्रक्रिया पूर्णपणे स्वयंचलित (ऑटोमॅटिक) केली जाईल, जेणेकरून ग्राहकांना वेळेत व्याज मिळू शकेल.
सर्वसामान्य कर्मचाऱ्यांवर काय होणार परिणाम?
सर्वसामान्य पीएफ धारकांसाठी या नवीन बदलांमुळे कागदपत्रांचा खच कमी होणार आहे. पीएफ कार्यालयात प्रत्यक्ष फेऱ्या मारण्याची गरज आता उरणार नाही. स्वतःचे पैसे काढणे, शिल्लक तपासणे किंवा दाव्याची सद्यस्थिती पाहणे आता अत्यंत सोपे आणि पारदर्शक होणार आहे. नोकरदारांना त्यांच्या हक्काचे पैसे तातडीने मिळावेत यासाठी ईपीएफओने उचललेले हे एक ऐतिहासिक पाऊल मानले जात आहे.
