West Bengal Violence: पश्चिम बंगालमध्ये निवडणुकीच्या निकालानंतर सुरू असलेला हिंसाचार थांबण्याचे नाव घेत नाहीये. बुधवारी रात्री उत्तर 24 परगणा जिल्ह्यातील मध्यग्राममध्ये भाजपचे ज्येष्ठ नेते शुभेंदु अधिकारी यांचे अत्यंत विश्वासू सहकारी आणि खासगी सचिव चंद्रनाथ रथ यांची निर्घृण हत्या करण्यात आली. या घटनेमुळे संपूर्ण राज्यात खळबळ उडाली असून राजकीय तणाव शिगेला पोहोचला आहे.
नेमकी घटना कशी घडली?
मिळालेल्या माहितीनुसार, चंद्रनाथ रथ आपल्या वाहनातून दोहरिया परिसरातून जात असताना ही घटना घडली. त्यांचा पाठलाग करणाऱ्या एका कारने त्यांच्या गाडीला ओव्हरटेक करून वेग कमी करण्यास भाग पाडले. त्याच वेळी दुचाकीवरून आलेल्या हल्लेखोरांनी त्यांच्यावर अगदी जवळून गोळ्या झाडल्या.
चंद्रनाथ यांना 4 गोळ्या लागल्या, ज्यातील 3 गोळ्या त्यांच्या छातीत, पोटात आणि डोक्यात शिरल्या. त्यांना तातडीने रुग्णालयात नेण्यात आले, मात्र डॉक्टरांनी त्यांना मृत घोषित केले. या हल्ल्यात त्यांचा चालकही गंभीर जखमी झाला असून त्याच्यावर उपचार सुरू आहेत.
तपासात काय समोर आले?
- ऑस्ट्रियन बनावटीचे पिस्तूल: घटनास्थळावरून मिळालेल्या पुराव्यांवरून ही हत्या करण्यासाठी ऑस्ट्रियन बनावटीच्या ‘ग्लोक पिस्तूल’चा (Glock Pistol) वापर करण्यात आल्याचा संशय पोलिसांनी व्यक्त केला आहे.
- सीसीटीव्ही आणि वाहने: पोलिसांनी एका संशयास्पद कारला ताब्यात घेतले असून तिची नंबर प्लेट बदलेली होती. परिसरातील सीसीटीव्ही फुटेजची तपासणी सुरू आहे.
- नियोजित कट: दुचाकीवर नंबर प्लेट नसल्याने हा एक पूर्वनियोजित हल्ला असावा, असा पोलिसांचा प्राथमिक अंदाज आहे.
राजकीय आरोप-प्रत्यारोप
या हत्येनंतर बंगालमध्ये पुन्हा एकदा भाजप आणि तृणमूल काँग्रेस (TMC) आमनेसामने आले आहेत. “राजकीय वैमनस्यातूनच चंद्रनाथ यांना लक्ष्य करण्यात आले आहे,” असा आरोप भाजप नेत्यांनी केला आहे. दुसरीकडे, तृणमूल काँग्रेसने या हत्येचा निषेध केला असून या प्रकरणाची सखोल न्यायालयीन चौकशी करण्याची मागणी केली आहे.
पश्चिम बंगाल विधानसभा निवडणुकीत भाजपने 294 पैकी 207 जागा जिंकून ऐतिहासिक विजय मिळवला आहे. मात्र, निकालांनंतर राज्यातील विविध भागांतून हिंसाचाराच्या बातम्या येत आहेत. मुख्य निवडणूक आयुक्तांनीही या प्रकरणाची गंभीर दखल घेत दोषींना तात्काळ अटक करण्याचे आदेश दिले आहेत.
