Ebola Alert : आफ्रिकेतील देशांमध्ये इबोला विषाणूचा प्रादुर्भाव वेगाने पसरत असल्यामुळे जागतिक आरोग्य संघटनेने (WHO) आंतरराष्ट्रीय स्तरावर सार्वजनिक आरोग्य आणीबाणी घोषित केली आहे. या पार्श्वभूमीवर भारत सरकारनेही विमानतळांवर कडक पावले उचलण्यास सुरुवात केली आहे.
अशातच, आफ्रिकेतील युगांडा देशातून भारतात आलेल्या एका 28 वर्षीय तरुणीला संशयास्पद लक्षणे दिसल्याने बंगळुरूमध्ये विलगिकरणात (क्वारंटाईन) ठेवण्यात आले आहे.
ही तरुणी 23 मे रोजी बंगळुरूच्या केम्पेगौडा आंतरराष्ट्रीय विमानतळावर उतरली होती. सध्या तिला इंदिरानगर येथील साथरोग रुग्णालयात विशेष देखरेखीखाली ठेवण्यात आले असून, या घटनेमुळे आरोग्य वर्तुळात मोठी खळबळ उडाली आहे.
Ebola Alert : पुण्याच्या राष्ट्रीय विषाणूविज्ञान संस्थेकडे नमुने रवाना
आरोग्य विभागाचे प्रधान सचिव ऋत्विक रंजनम पांडे यांनी दिलेल्या माहितीनुसार, या तरुणीमध्ये सध्या तीव्र तापासारखी कोणतीही गंभीर लक्षणे आढळलेली नाहीत. मात्र, विमानतळावर तपासणी दरम्यान तिला प्रचंड थकवा आणि अंगदुखी जाणवत असल्याचे सुरक्षा पथकाच्या लक्षात आले.
तातडीची उपाययोजना म्हणून आरोग्य अधिकाऱ्यांनी तिचे रक्ताचे नमुने गोळा केले आहेत. हे नमुने पुढील सखोल तपासणीसाठी पुण्याच्या प्रसिद्ध ‘राष्ट्रीय विषाणूविज्ञान संस्थेत’ (NIV) पाठवण्यात आले आहेत. या चाचणीचा अहवाल आल्यानंतरच तिला इबोलाची लागण झाली आहे की नाही, हे स्पष्ट होणार आहे.
Ebola Alert : हॉटेलमध्ये मुक्काम आणि आरोग्य यंत्रणा सतर्क
मिळालेल्या माहितीनुसार, युगांडाहून बंगळुरूमध्ये आल्यानंतर ही महिला सुरुवातीला एका हॉटेलमध्ये थांबली होती. तिथेच तिला शरीरात वेदना जाणवू लागल्याने तिने वैद्यकीय मदत घेतली. सध्या तिची प्रकृती स्थिर असून डॉक्टर तिच्यावर बारीक लक्ष ठेवून आहेत. नियमांनुसार, पुण्यातून पहिल्या चाचणीचा अहवाल आल्यानंतरही तिची पुन्हा एकदा दुसरी चाचणी केली जाणार आहे.
काँगो आणि युगांडा या देशांमधील गंभीर परिस्थिती पाहता जागतिक आरोग्य संघटनेने 17 मे रोजीच आणीबाणी लागू केली होती. त्यानंतर कर्नाटकच्या आरोग्य विभागाने कठोर नियमावली जारी करत इबोलाग्रस्त देशांमधून येणाऱ्या सर्व प्रवाशांना मायदेशी परतल्यावर सलग 21 दिवस स्वतःच्या आरोग्यावर बारकाईने लक्ष ठेवण्याचे आदेश दिले आहेत.
Ebola Alert : भारत सरकारचे प्रवाशांसाठी कडक नियम
केंद्र सरकारने विमानतळांवर येणाऱ्या आंतरराष्ट्रीय प्रवाशांसाठी काही मार्गदर्शक तत्त्वे जारी केली आहेत. त्यानुसार खालील नियम पाळणे बंधनकारक आहे:
- लक्षणे दिसल्यास माहिती देणे अनिवार्य: डेमोक्रॅटिक रिपब्लिक ऑफ काँगो, युगांडा आणि दक्षिण सुदान या देशांमधून येणाऱ्या प्रवाशांना जर ताप, अशक्तपणा, डोकेदुखी, स्नायूदुखी, उलट्या, जुलाब, घसा खवखवणे किंवा शरीरातून अचानक रक्तस्त्राव होणे अशी लक्षणे असतील, तर त्यांनी विमानतळावर उतरताच आरोग्य अधिकाऱ्यांना स्वतःहून माहिती देणे कायदेशीररित्या बंधनकारक आहे.
- संपर्कात आलेल्यांसाठी नियम: जर एखादा प्रवासी आफ्रिकेत कोणत्याही इबोलाबाधित रुग्णाच्या किंवा संशयिताच्या संपर्कात आला असेल, तर त्यानेही ही माहिती लपवून न ठेवता प्रशासनाला कळवणे गरजेचे आहे.
- 21 दिवसांचे विलगिकरण: प्रवास संपवून भारतात आल्यानंतर 21 दिवसांच्या आत जर वरीलपैकी कोणतेही लक्षण दिसून आले, तर प्रवाशाने जागा न दवडता स्वतःला घरातच विलगिकरणात ठेवावे आणि आरोग्य विभागाशी संपर्क साधावा.
हे देखील वाचा – Karnataka Political Crisis: कर्नाटक राजकारणात मोठा भूकंप! मुख्यमंत्री सिद्धरामय्या राजीनामा देण्याची शक्यता; डीके शिवकुमार यांच्याकडे सत्ता?
