Iran USA War : अमेरिका आणि इराण यांच्यातील वाढत्या लष्करी संघर्षामुळे संपूर्ण आखाती प्रदेशात (Gulf Region) युद्धाचा भडका उडाला आहे. दोन्ही देशांनी एकमेकांवर थेट हल्ले सुरू केल्यामुळे जागतिक स्तरावर अत्यंत संवेदनशील मानल्या जाणाऱ्या ‘होर्मुझच्या सामुद्रधुनीतील’ (Strait of Hormuz) आंतरराष्ट्रीय जलवाहतूक पूर्णपणे विस्कळीत झाली आहे. या वाढत्या तणावाच्या पार्श्वभूमीवर, इराणने संयुक्त अरब अमिरातीच्या (UAE) दोन व्यावसायिक जहाजांवर भीषण क्षेपणास्त्र हल्ला केला आहे. या दुर्दैवी हल्ल्यात एका भारतीय खलाशाचा (Merchant Navy Officer) मृत्यू झाला असून अन्य १० जण गंभीर जखमी झाले आहेत.
ओमानच्या सागरी हद्दीत थरार; पुण्याचा सुपुत्र हुतात्मा
एमव्ही जीएफएस गॅलेक्सी (MV GFS Galaxy) या कंटेनर जहाजावर ‘थर्ड इंजिनिअर’ म्हणून कार्यरत असलेले पुणेकर अधिकारी हेरंब करमरकर यांचा या हल्ल्यात करुण अंत झाला. मर्चंट नेव्हीमध्ये सेवा बजावणारे हेरंब करमरकर यांचे जहाज रविवारी पहाटे होर्मुझच्या सामुद्रधुनीतील ओमानच्या सागरी हद्दीतून जात होते. त्याच वेळी इराणकडून डागण्यात आलेल्या क्षेपणास्त्राचा फटका या जहाजाला बसला.
हल्ल्यानंतर जहाजाला भीषण आग लागली आणि त्यावरील कर्मचारी अडकून पडले. नौदलाच्या बचाव पथकाने तातडीने मोहीम राबवून जहाजावरील २३ कर्मचाऱ्यांना सुरक्षित बाहेर काढण्यात यश मिळवले. मात्र, या थरारात हेरंब करमरकर यांना वाचवता आले नाही. हेरंब यांचे कुटुंब पुण्याच्या मुंढवा परिसरात वास्तव्यास असून, त्यांचा पार्थिव देह लवकरात लवकर पुण्यात आणण्यासाठी केंद्र सरकार आणि प्रशासकीय पातळीवर वेगाने हालचाली सुरू करण्यात आल्या आहेत.
यूएईच्या तेल टँकर आणि एलएनजी जहाजांना लक्ष्य
संयुक्त अरब अमिरातीच्या (UAE) संरक्षण मंत्रालयाने दिलेल्या अधिकृत माहितीनुसार, इराणच्या सैन्याने क्रूझ क्षेपणास्त्रांचा (Cruise Missiles) मारा करून यूएईच्या ‘मोम्बासा’ (Mombasa) नावाच्या तेल टँकरला आणि ‘अल बहिया’ (Al Bahiya) नावाच्या एलएनजी (LNG) जहाजाला लक्ष्य केले. ही दोन्ही जहाजे दक्षिण नौकानयन मार्गावरून (South Shipping Lane) मार्गक्रमण करत होती. क्षेपणास्त्र आदळताच दोन्ही जहाजांवर आगीचा डोंब उसळला होता; मात्र तातडीने केलेल्या उपायांमुळे आगीवर नियंत्रण मिळवण्यात यश आले. या हल्ल्यात जखमी झालेल्या १० कर्मचाऱ्यांवर जवळच्या रुग्णालयात उपचार सुरू आहेत.
‘आंतरराष्ट्रीय कायद्याचे उल्लंघन’; यूएईचा इराणला चोख प्रत्युत्तराचा इशारा
या भ्याड हल्ल्याबाबत संयुक्त अरब अमिरातीने तीव्र संताप व्यक्त केला आहे. यूएईच्या संरक्षण मंत्रालयाने प्रसिद्ध केलेल्या पत्रकात म्हटले आहे की, “व्यावसायिक जहाजांवर करण्यात आलेला हा हल्ला आंतरराष्ट्रीय सागरी कायद्याचे उघड उल्लंघन आहे. अशा चिथावणीखोर कारवायांमुळे आखातातील शांतता धोक्यात आली असून प्रादेशिक तणाव आणखी वाढू शकतो.” हा संघर्ष अधिक तीव्र होऊ नये म्हणून आम्ही संयम बाळगत असलो, तरी स्वतःच्या सार्वभौमत्वाचे रक्षण करण्यासाठी आणि अशा आक्रमक कारवायांना चोख प्रत्युत्तर देण्यासाठी आम्ही पूर्णपणे सक्षम असून तो आमचा कायदेशीर अधिकार आहे, असा थेट आणि कडक इशारा यूएईने इराणला दिला आहे.
