Monsoon Update: एप्रिल 2026 संपत आला असतानाच उत्तर, मध्य आणि पूर्व भारतासह महाराष्ट्र भीषण उष्णतेचा सामना करत आहे. अनेक ठिकाणी तापमान 43 ते 44 अंशांवर पोहोचले असून हवामान विभागाने पुढील काही दिवस हीच स्थिती राहण्याचा इशारा दिला आहे. मात्र, या प्रचंड उकाड्याच्या पार्श्वभूमीवर एक अत्यंत आनंदाची बातमी समोर आली आहे.
युरोपियन सेंटर फॉर मीडियम-रेंज वेदर फोरकास्ट्सच्या (ECMWF) ताज्या अंदाजानुसार, नैऋत्य मान्सून (Monsoon Update) यंदा वेळेपूर्वीच भारतात दाखल होण्याची दाट शक्यता आहे. मे महिन्याच्या अखेरपर्यंत दक्षिण भारतात पावसाचे आगमन होऊन नागरिकांना मोठा दिलासा मिळू शकतो.
Monsoon Update: मान्सूनचे आगमन कधी आणि कुठे?
हवामान तज्ज्ञांच्या मते, मान्सूनच्या वाटचालीसाठी सध्याची स्थिती अत्यंत पोषक आहे.
- अंदमान आणि निकोबार: मे महिन्याच्या 18 ते 25 तारखेदरम्यान मान्सून अंदमान आणि निकोबार बेटांवर धडकण्याची शक्यता आहे. या काळात तेथे सरासरीपेक्षा 30 ते 60 मिमी अधिक पावसाची नोंद होऊ शकते.
- केरळ: मे महिन्याच्या शेवटच्या आठवड्यात म्हणजेच 25 मे ते 1 जून दरम्यान मान्सूनची पावले केरळकडे वळतील. अरबी समुद्रातून वाहणारे वारे बाष्प घेऊन भारताच्या पश्चिम किनारपट्टीकडे वेगाने सरकत आहेत.
- परिणाम: जर वातावरणातील ही स्थिती कायम राहिली, तर 25 मेच्या आसपास केरळमध्ये अधिकृतपणे मान्सूनचे आगमन झाल्याची घोषणा होऊ शकते.
Monsoon Update: पाऊस वेळेआधी येण्याचे कारण काय?
मान्सून तज्ज्ञ देवेंद्र त्रिपाठी यांच्या मते, यंदा अनेक घटक पावसासाठी अनुकूल आहेत.
- एल निनोची अनुपस्थिती: यंदा मान्सूनच्या सुरुवातीला ‘एल निनो’चा प्रभाव नसेल, जे पावसासाठी चांगले संकेत आहेत.
- इंडियन ओशन डायपोल (IOD): जेव्हा हिंदी महासागराचा पश्चिम भाग पूर्वेपेक्षा जास्त उबदार असतो, तेव्हा त्याला ‘पॉझिटिव्ह आयओडी’ म्हणतात. सध्याची स्थिती पाहता हा घटक मान्सूनला अधिक बळकटी देण्याची शक्यता आहे.
- भीषण उष्णता: भारतात सध्या पडत असलेली तीव्र उष्णता देखील मान्सूनच्या वाऱ्यांना खेचून घेण्यास मदत करत आहे. जमिनीवरील उष्णतेमुळे तयार झालेला कमी दाबाचा पट्टा हिंदी महासागरातील बाष्पयुक्त वारे वेगाने खेचून घेतो.
गेल्या वर्षी म्हणजेच 2025 मध्येही मान्सूनने वेळेआधीच हजेरी लावली होती. यंदाही तोच कल कायम राहण्याची शक्यता असल्याने बळीराजाला पेरणीच्या कामांसाठी लवकर सज्ज होता येईल. उष्णतेने होरपळून निघालेल्या दक्षिण भारताला मे महिन्याच्या अखेरीस वरुणराजा नक्कीच सुखद धक्का देईल, असे सध्याची मॉडेल्स सांगत आहेत.
हे देखील वाचा –
Sai Sudharsan Record: साई सुदर्शनने रचला इतिहास! ख्रिस गेलचा ‘तो’ मोठा विक्रम मोडला
