UP Weather Disaster : उत्तर प्रदेशात गेल्या २४ तासांत निसर्गाने रौद्र रूप धारण केले असून, भीषण चक्रीवादळ आणि मुसळधार पावसामुळे राज्याचे जनजीवन पूर्णपणे विस्कळीत झाले आहे. या नैसर्गिक आपत्तीत आतापर्यंत राज्यातील विविध जिल्ह्यांमध्ये मिळून १०१ जणांनी आपला जीव गमावला आहे. यामध्ये सर्वाधिक जीवितहानी प्रयागराज जिल्ह्यात झाली असून, तेथे २१ जणांचा मृत्यू झाला आहे. जीवितहानीसोबतच राज्यातील शेती आणि घरांचे अतोनात आर्थिक नुकसान झाले असून, अनेक कुटुंबांचे संसार उघड्यावर आले आहेत.
जिल्हानिहाय मृतांचा आकडा आणि भीषणता
राज्यातील मृत्यूची आकडेवारी पाहता या संकटाची भीषणता स्पष्ट होते. प्रयागराज (२१), भदोही (१८), मिर्झापूर (१७) आणि फतेहपूर (१०) या जिल्ह्यांमध्ये मृत्यूचे प्रमाण अधिक आहे. याशिवाय उन्नाव आणि बदायूंमध्ये प्रत्येकी ६, तर प्रतापगड आणि बरेलीमध्ये प्रत्येकी ४ जणांचा मृत्यू झाला आहे. सीतापूर, चंदौली, कानपूर देहात, संभल आणि रायबरेली यांसारख्या जिल्ह्यांमध्येही जीवितहानी झाली आहे. वादळाचा वेग इतका प्रचंड होता की, बरेली जिल्ह्यात एक व्यक्ती हवेत उडाल्याची धक्कादायक दृश्ये समाजमाध्यमांवर प्रसारित झाली आहेत.
आगीच्या घटना आणि मालमत्तेची हानी
केवळ पाऊस आणि वादळच नव्हे, तर या आपत्तीमुळे लागलेल्या आगीनेही मोठे नुकसान केले आहे. कौशाम्बी जिल्ह्यातील कोखराज पोलीस ठाण्याच्या हद्दीत असलेल्या तरसौरा गावात वादळामुळे वीज पडल्याने किंवा ठिणगी उडाल्याने भीषण आग लागली. या आगीच्या भक्ष्यस्थानी १२ कच्ची घरे आली असून, ती जळून खाक झाली आहेत. या घटनेत एका पाळीव प्राण्याचाही दुर्दैवी मृत्यू झाला. तसेच, अनेक ठिकाणी झाडे कोसळल्याने वीजपुरवठा खंडित झाला असून, कच्च्या घरांची आणि पत्र्यांच्या शेडची मोठ्या प्रमाणावर पडझड झाली आहे.
बळीराजावर संकट आणि मुख्यमंत्र्यांचे निर्देश
ऐन काढणीच्या हंगामात आलेल्या या संकटामुळे शेतकऱ्यांची उभी पिके आडवी झाली असून, अन्नदात्यासमोर मोठे आर्थिक संकट उभे राहिले आहे. या भीषण परिस्थितीची तातडीने दखल घेत मुख्यमंत्री योगी आदित्यनाथ यांनी प्रशासकीय यंत्रणेला सतर्क राहण्याचे आदेश दिले आहेत. पीडित कुटुंबांना तात्काळ आर्थिक मदत पोहोचवण्याचे आणि नुकसान भरपाईची प्रक्रिया विनाविलंब पूर्ण करण्याचे निर्देश त्यांनी दिले आहेत. “मदतकार्यात कोणतीही हलगर्जीपणा सहन केला जाणार नाही,” असा कडक इशाराही मुख्यमंत्र्यांनी जिल्हाधिकाऱ्यांना दिला आहे.
हवामान विभागाचा इशारा
राज्यातील वातावरण अजूनही स्थिर झालेले नाही. हवामान विभागाने पुढील काही दिवसांसाठी पुन्हा एकदा वादळी वाऱ्यासह पावसाचा इशारा (Alert) जारी केला आहे. नागरिकांनी सुरक्षित स्थळी आश्रय घ्यावा आणि झाडांच्या खाली उभे राहणे टाळावे, असे आवाहन प्रशासनाकडून करण्यात आले आहे. आपत्ती व्यवस्थापन विभागाची पथके सध्या बाधित क्षेत्रांत मदत आणि बचाव कार्यासाठी तैनात आहेत.
