India vs Pakistan Handshake Row : भारत आणि पाकिस्तान यांच्यातील क्रिकेट सामने मैदानातील चुरशीसोबतच मैदानाबाहेरच्या वादांमुळेही नेहमीच चर्चेत असतात. गेल्या काही काळापासून दोन्ही देशांच्या खेळाडूंमध्ये ‘हॅन्डशेक’ न करण्याचे म्हणजेच हस्तांदोलन न करण्याचे धोरण अवलंबले जात आहे. या प्रकरणावर आता पाकिस्तानचा कर्णधार सलमान अली आघा याने मौन सोडले असून आशिया चषक 2025 मधील एक प्रसंग सांगितला आहे.
India vs Pakistan Handshake Row : नाणेफेकीपूर्वीच मिळाली होती सूचना
एका पॉडकास्टमध्ये बोलताना आघाने सांगितले की, आशिया चषकादरम्यान नाणेफेकीसाठी जात असताना त्याला पहिल्यांदा या धोरणाबद्दल समजले. तो म्हणाला, “नाणेफेकीला जाण्यापूर्वी सर्व काही सामान्य होते. पत्रकार परिषद आणि ट्रॉफी फोटोशूटवेळी आम्ही हस्तांदोलन केले होते. मात्र, टॉसला जाताना मॅच रेफरीने मला बाजूला नेले आणि सांगितले की, आज सामन्यात हस्तांदोलन होणार नाही. त्यावर मी म्हणालो की, ठीक आहे, मलाही त्यात फारसा रस नाही.”
India vs Pakistan Handshake Row : ड्रेसिंग रूममध्ये जाऊनही प्रतिसाद नाही?
सलमान अली आघाने असा दावा केला आहे की, सामना संपल्यानंतर पाकिस्तानी संघ भारतीय खेळाडूंना भेटण्यासाठी त्यांच्या ड्रेसिंग रूमपर्यंत गेला होता. “सामना संपल्यानंतर आम्ही शिष्टाचार म्हणून त्यांच्या पॅव्हेलियनमध्ये गेलो होतो, पण तरीही तिथे हस्तांदोलन झाले नाही,” असे त्याने नमूद केले. भारताने पहलगाम हल्ल्यानंतर राष्ट्रीय भावना लक्षात घेऊन हे कडक धोरण स्वीकारले होते, जे आजही कायम आहे.
India vs Pakistan Handshake Row : “हा चुकीचा संदेश आहे”
कर्णधार म्हणून आघाने या धोरणावर नाराजी व्यक्त केली आहे. तो म्हणाला, “मी अनेकदा सांगितले आहे की हे योग्य नाही. आम्ही देशाचे प्रतिनिधित्व करतो आणि अनेक मुले आमचा आदर्श डोळ्यासमोर ठेवतात. जर आम्हीच असे वागलो, तर उद्या क्लब क्रिकेट खेळणारी मुलेही हेच शिकतील. एक आदर्श खेळाडू म्हणून मला वाटतं की ही चांगली गोष्ट नाही.”
धोरण आजही कायम
भारत आणि पाकिस्तानमधील हे हस्तांदोलन न करण्याचे धोरण केवळ पुरुष संघापुरते मर्यादित राहिलेले नाही. महिला एकदिवसीय विश्वचषक 2025, अंडर-19 आशिया चषक आणि नुकत्याच झालेल्या टी-20 विश्वचषक 2026 मध्येही दोन्ही देशांच्या खेळाडूंनी एकमेकांशी हस्तांदोलन टाळल्याचे पाहायला मिळाले. कोलंबोमध्ये झालेल्या सामन्यातही हेच चित्र कायम होते.
हे देखील वाचा –
