RCB vs KKR : आयपीएल २०२६ च्या रणसंग्रामात काल रॉयल चॅलेंजर्स बंगळुरूने (RCB) कोलकाता नाईट रायडर्सचा (KKR) ६ गडी राखून पराभव करत एक अविस्मरणीय विजय नोंदवला. या विजयाचा खऱ्या अर्थाने शिल्पकार ठरला तो म्हणजे आधुनिक क्रिकेटचा ‘किंग’ विराट कोहली. विराटने केवळ ५८ चेंडूंमध्ये शतकी मजल मारत १०५ धावांची नाबाद खेळी साकारली आणि मैदानावर इतिहासाची पुनरावृत्ती केली. या शतकासह विराट कोहली आता टी-२० क्रिकेटमध्ये सर्वाधिक शतके झळकावणारा भारतीय फलंदाज बनला असून, त्याने क्रिकेट विश्वात आपले वर्चस्व पुन्हा एकदा सिद्ध केले आहे.
रायपूरच्या मैदानावर आरसीबीचा नवा विक्रम-
आरसीबीने या सामन्यात केवळ विजयच मिळवला नाही, तर रायपूरच्या शहीद वीर सिंह नारायण सिंह स्टेडियमवर आयपीएल इतिहासातील सर्वात मोठ्या धावसंख्येचा यशस्वी पाठलाग करण्याचा पराक्रमही केला. कोलकात्याने विजयासाठी दिलेले १९३ धावांचे भव्य आव्हान बंगळुरूने अत्यंत शिस्तबद्ध आणि आक्रमक पद्धतीने पूर्ण केले. विशेष म्हणजे, आरसीबीने स्वतःचाच जुना विक्रम मोडीत काढला आहे; याच हंगामात त्यांनी मुंबई इंडियन्सविरुद्ध १६७ धावांचे लक्ष्य गाठले होते, जो आतापर्यंतचा त्यांचा मोठा विजय होता.
विक्रमांचा बादशहा: विराट कोहली-
विराट कोहलीच्या बॅटने काल अनेक विक्रम मोडीत काढले. आयपीएल कारकिर्दीतील हे त्याचे ९ वे शतक ठरले असून, या स्पर्धेच्या इतिहासात सर्वाधिक शतके ठोकण्याचा विक्रम आता त्याच्या नावावर जमा झाला आहे. इतकेच नव्हे तर, टी-२० फॉरमॅटमध्ये सर्वाधिक शतके करणाऱ्या भारतीयांच्या यादीतही त्याने अव्वल स्थान पटकावले आहे. या शर्यतीत त्याने ९ शतके नोंदवणाऱ्या अभिषेक शर्माला मागे टाकले, तर केएल राहुल, रोहित शर्मा आणि संजू सॅमसन (प्रत्येकी ८ शतके) हे दिग्गज खेळाडू आता विराटाच्या मागे आहेत.
केकेआरची फलंदाजी आणि रघुवंशीचा प्रतिकार-नाणेफेक हारल्यानंतर प्रथम फलंदाजीस आलेल्या कोलकाता नाईट रायडर्सची सुरुवात डळमळीत झाली होती. सलामीवीर फिन ॲलन (१८) आणि कर्णधार अजिंक्य रहाणे (१९) स्वस्तात बाद झाल्याने संघ अडचणीत सापडला होता. मात्र, युवा यष्टीरक्षक अंगक्रिश रघुवंशीने ४६ चेंडूत ७१ धावांची तेजस्वी खेळी करून संघाचा डोलारा सावरला. त्याला कॅमेरून ग्रीनने ३२ धावांची मोलाची साथ दिली. अखेरच्या षटकांमध्ये रिंकू सिंगने आपल्या शैलीनुसार २९ चेंडूत ४९ धावांची नाबाद फटकेबाजी केल्याने कोलकात्याने ४ बाद १९२ धावांचा डोंगर उभा केला. बंगळुरूकडून भुवनेश्वर कुमार, जोश हेझलवूड आणि रसिक सलाम दार यांनी प्रत्येकी एक बळी मिळवला.
विजयाचा थरार आणि कोहलीचा संघर्ष-
१९३ धावांच्या लक्ष्याचा पाठलाग करताना आरसीबीचा सलामीवीर जेकब बेथेल १५ धावा करून माघारी परतला, पण त्यानंतर विराटने खेळाची सर्व सूत्रे आपल्या हातात घेतली. विराटने ६० चेंडूंच्या प्रदीर्घ वास्तव्यात ११ चौकार आणि ३ उत्तुंग षटकारांच्या मदतीने नाबाद १०५ धावांची खेळी केली. त्याने देवदत्त पडिक्कलसोबत (३९) दुसऱ्या गड्यासाठी ९२ धावांची महत्त्वपूर्ण भागीदारी करून विजयाचा पाया रचला.
