Virat Kohli : भारतीय क्रिकेट संघाचा दिग्गज फलंदाज विराट कोहली सध्या मैदानावरील कामगिरीपेक्षा सोशल मीडियावरील एका कृतीमुळे चर्चेच्या केंद्रस्थानी आला आहे. एका जर्मन मॉडेलच्या, लिझालाजच्या छायाचित्राला विराटच्या अधिकृत खात्यावरून ‘लाईक’ मिळाल्यानंतर इंटरनेटवर प्रतिक्रियांचा पाऊस पडला. आता या संपूर्ण प्रकरणावर खुद्द लिझालाजने तिचे मौन सोडले असून, या अनपेक्षित प्रसिद्धीबद्दल आश्चर्य व्यक्त केले आहे.
लिझालाजची भूमिका आणि भारताशी असलेले नाते-
हिंदुस्तान टाइम्सशी संवाद साधताना लिझालाज म्हणाली की, “सकाळी उठल्यावर मला अचानक आपण बातम्यांमध्ये असल्याचे समजले, तेव्हा मला धक्काच बसला. विराटने ते छायाचित्र नेमके कधी ‘लाईक’ केले, याची मला कल्पना नव्हती. मात्र, लोकांनी मला विविध माध्यमांवरून त्या बातम्यांचे कात्रण आणि संदेश पाठवण्यास सुरुवात केली, तेव्हा या घटनेची व्याप्ती लक्षात आली.” लिझालाज ही एक जर्मन-दक्षिण आफ्रिकन मॉडेल आणि व्लॉगर असून, भारतात तिच्या प्रवासाशी संबंधित व्हिडिओंमुळे ती आधीच लोकप्रिय आहे. तिने आपल्या भारत भेटीदरम्यान गोवा, मुंबई, चेन्नई आणि विशेषतः बंगळूरमध्ये बराच काळ व्यतीत केला होता. याच काळात रॉयल चॅलेंजर्स बंगळूर (RCB) या संघाचा खेळ पाहताना ती विराट कोहलीची चाहती बनली होती.
फोटोग्राफरचा दावा आणि विराटचा ‘अनलाईक’चा पवित्रा-
हे संपूर्ण प्रकरण तेव्हा प्रकाशात आले, जेव्हा लिझालाजचे छायाचित्र टिपणारे प्रसिद्ध छायाचित्रकार अद्वैत वैद्य यांनी सोशल मीडियावर एक स्क्रीनशॉट सामायिक केला. यामध्ये विराट कोहलीच्या अधिकृत हँडलवरून लिझालाजच्या एका जुन्या छायाचित्राला पसंती दर्शवण्यात आली होती. अद्वैतने याला “विराट कोहली (The GOAT) कडून मिळालेली पावती” असे संबोधले. मात्र, काही काळानंतर विराटने ते ‘लाईक’ काढून टाकले (Dislike/Unlike केले). यावर प्रतिक्रिया देताना लिझालाज म्हणाली, “विराटने ते लाईक काढल्याचे पाहून मला थोडे वाईट वाटले, पण तो इतका मोठा वादाचा विषय का झाला, हे मला समजत नाही. कदाचित त्याचा तो हेतू नसेल, पण तरीही मला त्याच्या पाठिंब्याचा आनंद आहे.”
अल्गोरिदम की मानवी चूक?
विराट कोहलीच्या बाबतीत अशा प्रकारची ही पहिलीच घटना नाही. यापूर्वी मे २०२५ मध्ये अभिनेत्री अवनीत कौरच्या छायाचित्राबाबतही असाच प्रसंग ओढवला होता. त्यावेळी विराटने स्पष्टीकरण दिले होते की, सोशल मीडियावरील फीड तपासत असताना अल्गोरिदमच्या त्रुटीमुळे किंवा चुकीच्या स्पर्शामुळे असे घडले असावे. चालू प्रकरणाबाबतही कोहलीने अधिकृतरीत्या काहीही स्पष्ट केलेले नसले, तरी ही केवळ तांत्रिक चूक असण्याची शक्यता वर्तवण्यात येत आहे.
प्रसिद्धीचा व्यावसायिक फायदा-
या एका घटनेमुळे लिझालाजच्या लोकप्रियतेत कमालीची वाढ झाली आहे. तिला कामाच्या अनेक नवीन संधी आणि ऑफर्स मिळत आहेत. “या घटनेनंतर माझ्याकडे अनेक प्रस्ताव आले आहेत, परंतु मला संगीत आणि व्लॉगिंगमध्ये करिअर करायचे असल्याने मी विचारपूर्वक निर्णय घेणार आहे,” असे तिने नमूद केले.
