Bachchu Kadu Eknath Shinde : महाराष्ट्राच्या राजकारणातील अत्यंत आक्रमक, शेतकरी-कष्टकरी आणि दिव्यांग बांधवांचे कैवारी म्हणून ओळखले जाणारे ‘प्रहार जनशक्ती पक्षा’चे संस्थापक अध्यक्ष बच्चू कडू यांनी आज अखेर एक नवा राजकीय अध्याय सुरू केला आहे. उपमुख्यमंत्री एकनाथ शिंदे यांच्या नेतृत्वाखालील ‘शिवसेना’ पक्षात बच्चू कडू यांनी आपल्या असंख्य समर्थकांसह जाहीर प्रवेश केला.
या सोहळ्याला राज्याचे उद्योगमंत्री उदय सामंत आणि शिवसेनेचे अनेक दिग्गज नेते उपस्थित होते. या पक्षप्रवेशामुळे महायुतीची शक्ती विशेषतः विदर्भ आणि ग्रामीण महाराष्ट्रात अधिक वृद्धिंगत झाली आहे. कडू यांच्या राजकीय प्रवासाची सुरुवात शिवसेनेतूनच झाली होती, त्यामुळे हा प्रवेश म्हणजे एका अर्थाने त्यांचे ‘घरवापसी’चेच पाऊल मानले जात आहे.
विदर्भाच्या राजकारणावर होणारा परिणाम
बच्चू कडू यांच्या रूपाने शिवसेनेला अमरावतीसह संपूर्ण विदर्भात एक मोठा चेहरा मिळाला आहे. आगामी विधानसभा निवडणुकीच्या पार्श्वभूमीवर, कडू यांची आक्रमक कार्यशैली आणि तळागाळातील लोकांशी असलेली त्यांची नाळ शिवसेनेसाठी लाभदायक ठरणार आहे. केवळ सत्तेसाठी हा प्रवेश झाला नसून, बच्चू कडू यांनी मांडलेल्या काही मूलभूत अटी आणि मागण्यांवर उपमुख्यमंत्री एकनाथ शिंदे यांनी सहमती दर्शवली आहे.
