Sunetra Pawar : आगामी काळातील राजकीय आव्हाने पेलण्यासाठी राष्ट्रवादी काँग्रेस पक्षाने (अजित पवार गट) कंबर कसली असून, आता जागतिक कीर्तीचे राजकीय रणनीतीकार प्रशांत किशोर ऊर्फ ‘पीके’ यांची नियुक्ती करण्याचा महत्त्वपूर्ण निर्णय घेतला आहे. १९ मे रोजी सकाळी राष्ट्रवादी काँग्रेसच्या राष्ट्रीय अध्यक्षा सुनेत्रा पवार आणि पार्थ पवार यांनी प्रशांत किशोर यांची भेट घेतली. या उच्चस्तरीय बैठकीत पक्षाच्या भवितव्यासाठी आणि संघटनात्मक बांधणीसाठी प्रशांत किशोर यांच्याकडे धुरा सोपवण्यावर शिक्कामोर्तब करण्यात आले आहे.
१ जूनपासून कार्यारंभाची शक्यता
मिळालेल्या विश्वसनीय माहितीनुसार, या नियुक्तीबाबतचे सर्व औपचारिक सोपस्कर पूर्ण झाले असून येत्या दोन दिवसांत कायदेशीर प्रक्रिया पार पडणार आहे. १ जून २०२६ पासून प्रशांत किशोर आणि त्यांची चमू अधिकृतपणे राष्ट्रवादी काँग्रेससाठी रणनीती आखण्याचे काम सुरू करेल. पुढील तीन वर्षे पक्षाच्या विस्तारासाठी अत्यंत कळीची मानली जात आहेत. त्यामुळे २०२९ च्या आगामी विधानसभा आणि लोकसभा निवडणुकांसाठी पक्षाने आतापासूनच ‘रणशिंग’ फुंकल्याची चर्चा राजकीय वर्तुळात रंगली आहे.
कोण आहेत प्रशांत किशोर?
प्रशांत किशोर हे भारतीय राजकारणातील एक दिग्गज नाव असून, त्यांना निवडणुकीचे ‘चाणक्य’ मानले जाते. २०१४ च्या लोकसभा निवडणुकीत नरेंद्र मोदींच्या झंझावाती प्रचाराचे नियोजन केल्यानंतर ते प्रकाशझोतात आले. त्यानंतर त्यांनी बिहारमध्ये नितीश कुमार, पश्चिम बंगालमध्ये ममता बॅनर्जी, आंध्र प्रदेशात जगन मोहन रेड्डी आणि तामिळनाडूमध्ये एम. के. स्टॅलिन यांसारख्या नेत्यांना सत्तेपर्यंत पोहोचवण्यात मोलाची भूमिका बजावली आहे. ‘जन सुराज’ अभियानाचे संस्थापक असलेल्या किशोर यांनी यापूर्वी संयुक्त राष्ट्रसंघात (UN) सार्वजनिक आरोग्य क्षेत्रात ८ वर्षे कार्य केले आहे.
नरेश अरोरा यांच्यानंतरची नवी व्यवस्था
यापूर्वी ‘डिझाईन बॉक्स’ या संस्थेचे प्रमुख नरेश अरोरा राष्ट्रवादी काँग्रेससाठी काम पाहत होते. अजित पवार यांच्या राजकीय प्रवासातील अत्यंत गाजलेले ‘गुलाबी कॅम्पेनिंग’ आणि ‘लाडकी बहीण’ योजनेचा प्रचार नरेश अरोरा यांच्या कल्पकतेतूनच साकारला होता. त्यांच्या रणनीतीमुळे विधानसभा निवडणुकीत पक्षाला चांगले यशही मिळाले होते. मात्र, मध्यंतरीच्या काही घटनांनंतर डिझाईन बॉक्सचे काम थांबले होते. आता ही रिक्त झालेली जागा प्रशांत किशोर भरून काढणार असून, ते अजित पवारांच्या पक्षाला एका नव्या उंचीवर नेण्यासाठी प्रयत्नशील असतील.
२०२९ चे ध्येय आणि प्रतिमा संवर्धन
राजकीय ब्रँडिंग, सूक्ष्म नियोजन आणि जनमत चाचण्यांचा अचूक अंदाज घेण्यात प्रशांत किशोर यांचा हातखंडा आहे. राष्ट्रवादी काँग्रेसच्या प्रतिमेचे संवर्धन करणे, तळागाळातील कार्यकर्त्यांपर्यंत पक्षाची विचारधारा पोहोचवणे आणि विरोधकांवर मात करण्यासाठी प्रभावी संदेश यंत्रणा उभारणे, ही त्यांच्यापुढील मुख्य आव्हाने असतील.
