छत्रपती संभाजीनगर
हिंदू हृदयसम्राट बाळासाहेब ठाकरे महाराष्ट्र समृद्धी महामार्गावर पॉवर ग्रिड ट्रान्समीमिशन अति उच्चदाब वाहिनी टॉवरचे काम करण्यात येणार आहे. त्यासाठी जालना ते छत्रपती संभाजीनगर दरम्यान दोन्ही बाजूंची वाहतुक उद्यापासून तीन दिवस दुपारी १२ ते ३ या वेळेत बंद राहणार आहे. उर्वरित कालावधीत वाहतूक सुरळीत सुरु असेल. या बंद कालावधीत पर्यायी मार्गावरुन वाहतुक वळविण्यात आली आहे, असे महाराष्ट्र राज्य रस्ते विकास महामंडळाचे अधीक्षक अभियंता व प्रकल्प संचालक रामदास खलसे यांनी सांगितले.
यासंदर्भात महाराष्ट्र राज्य रस्ते विकास महामंडळाने परिपत्रक जारी केले आहे. ‘हिंदू हृदयसम्राट बाळासाहेब ठाकरे महाराष्ट्र समृद्धी महामार्गावर पॉवर ग्रिड ट्रान्समीशन अती उच्चदाब वाहिनी टॉवरचे काम करण्यात येणार आहे. हे काम ३१ ऑक्टोबर ते २ नोव्हेंबर असे तीन दिवस सुरु राहणार आहे. दुपारी १२ ते ३ यावेळात हे काम चालणार आहे. त्यामुळे या काळात तुम्ही छत्रपती संभाजीनगर ते जालना दरम्यान समृद्धी महामार्गावरून प्रवास करणार असाल तर तुम्हाला पर्यायी मार्गाचा वापर करावा लागणार आहे’, असे पत्रकात म्हटले आहे. या महामार्ग बंद दरम्यान रस्ते विकास महामंडळाने पर्यायी रस्त्यांचा वापर करण्याचे आवाहन नागरिकांना केले आहे.
‘जालना ते छत्रपती संभाजीनगर दरम्यान समृद्धी महामार्गावरील जालना इंटरचेंज ते सावंगी इंटरचेंज दरम्यान नागपूरकडून मुंबईकडे जाणारी वाहतुक, निधोना (जालना) इंटरचेंजमधून बाहेर पडून निधोना एमआयडीसी मार्गे- राष्ट्रीय महामार्ग जालना-छत्रपती संभाजीनगर मार्गे केंब्रीज शाळेपर्यंत नंतर ती उजवीकडे वळून सावंगी बायपास मार्गे सावंगी इंटरचेंज (छत्रपती संभाजीनगर) येथे समृद्धी महामार्गावर प्रवेश करुन शिर्डीकडे रवाना होईल. तर समृद्धी महामार्गावरील शिर्डीकडून नागपूरकडे जाणारी वाहतूक, सावंगी इंटरचेंज (छत्रपती संभाजीनगर) येथून बाहेर पडून वर नमूद केलेल्या मार्गावरुन (विरुद्ध दिशेने) निधोना (जालना) इंटरचेंज या ठिकाणी समृद्धी महामार्गावर प्रवेश करुन नागपूरकडे रवाना होईल,’ असे महाराष्ट्र राज्य रस्ते विकास महामंडळाचे अधीक्षक अभियंता व प्रकल्प संचालक रामदास खलसे यांनी सांगितले.
