पाटणा –
उत्तर बिहारचे देवघर म्हणून ओळखल्या जाणाऱ्या मुझफ्फरपूरच्या बाबा गरीबनाथ मंदिराची दानपेटी ६ महिन्यांनंतर उघडण्यात आली, तेव्हा दानपेटीत ठेवलेल्या लाखो रुपयांच्या नोटा कुजलेल्या सापडल्या. नाणीही गंजली आहेत.
मंदिराच्या दानपेटीत ठेवलेले पैसे यापूर्वी आठवड्यातून एकदा काढले जात होते. मात्र, नियमात बदल केल्यामुळे आज सहा महिन्यांनी ती उघडण्यात आली.
जिल्हा प्रशासन व पोलीस प्रशासनाच्या देखरेखीखाली दानपेटीत ठेवलेले पैसे भाविकांनी बाहेर काढून मोजणी केली, तेव्हा असे आढळले की, पाऊस आणि अभिषेकाचे पाणी दानपेटीत गेल्यामुळे आतील नोटा खराब झाल्या. लाखो रुपयांच्या नोटा खराब झाल्याने मंदिराचे पुजारी संतप्त झाले आहेत. बाबा गरीबनाथ मंदिराचे पुजारी अभिषेक पाठक म्हणाले की, पूर्वी आठवड्यातून एकदा दानपेटी उघडून पैसे काढले जात होते, मात्र आता सहा महिन्यांनंतर दानपेटीतून पैसे काढले जात असल्याने हे घडले.
मंदिराचे अध्यक्ष अतिरिक्त मुख्य सचिव मिहिर कुमार सिंह म्हणाले की, पावसामुळे नोटा खराब होतात, त्यामुळे रिझर्व्ह बँकेकडून त्या बदलून घेतल्या जातील.