Ajit Pawar Death : राज्याचे माजी उपमुख्यमंत्री अजित पवार यांच्या विमान अपघाताच्या अत्यंत गंभीर आणि संवेदनशील प्रकरणावरून महाराष्ट्राचे राजकीय वातावरण पुन्हा एकदा तापले आहे. विधान परिषदेत आज, सोमवारी या विषयावर सविस्तर चर्चा होऊन सरकारकडून स्पष्टीकरण मिळणे अपेक्षित होते. मात्र, ऐनवेळी ही महत्त्वपूर्ण चर्चा तीन दिवसांसाठी पुढे ढकलण्याचा निर्णय घेण्यात आला आहे. या निर्णयामुळे राजकीय वर्तुळात उलटसुलट चर्चांना उधाण आले असून, दोन्ही राष्ट्रवादी काँग्रेस गटांनी या विलंबाबद्दल तीव्र शब्दांत आपली नाराजी व्यक्त केली आहे.
अधिकच्या माहितीनुसार, अजित पवार यांच्याशी संबंधित या संवेदनशील विषयावर सत्ताधारी बाकांवरील राष्ट्रवादी काँग्रेस (अजित पवार गट) आणि विरोधी बाकांवरील राष्ट्रवादी काँग्रेस (शरद पवार गट) हे दोन्ही गट परस्परांविरुद्ध अत्यंत आक्रमक भूमिका घेण्याची दाट शक्यता होती. हा संभाव्य राजकीय संघर्ष आणि सभागृहातील गोंधळ टाळण्यासाठीच प्रशासकीय पातळीवर ही चर्चा पुढे ढकलण्याचा हालचाली झाल्याचे बोलले जात आहे.
अजित पवार विमान अपघात प्रकरण: “अपघाताला वैमानिकाची चूकच कारणीभूत”; व्हीएसआर कंपनीच्या मालकाचा सीआयडीसमोर धक्कादायक जबाब-
राज्याचे माजी उपमुख्यमंत्री अजित पवार यांच्या विमान अपघात प्रकरणाच्या सीआयडी (CID) तपासाला आता वेग आला असून, या प्रकरणाला एक अत्यंत महत्त्वाचे आणि खळबळजनक वळण प्राप्त झाले आहे. या अपघाताशी संबंधित ‘व्हीएसआर’ (VSR) विमान कंपनीचे मालक व्ही. के. सिंग यांची पुणे येथे सलग तीन दिवस कसून चौकशी करण्यात आली. या प्रदीर्घ चौकशीदरम्यान सिंग यांनी आपला जबाब नोंदवला असून, त्यांनी या अपघाताचे खापर थेट वैमानिकावर फोडले आहे. त्यांच्या या विधानामुळे राजकीय आणि नागरी विमान वाहतूक क्षेत्रात मोठी खळबळ उडाली आहे.
वैमानिक सुमित कपूर यांच्यावर ठपका-
सीआयडीच्या वरिष्ठ अधिकाऱ्यांसमोर दिलेल्या जबाबात व्ही. के. सिंग यांनी अत्यंत स्पष्टपणे नमूद केले की, “अजित पवार यांच्या विमानाला झालेला अपघात हा तांत्रिक बिघाडापेक्षा वैमानिक सुमित कपूर यांच्या चुकीच्या निर्णयामुळे किंवा त्रुटीमुळे झाला आहे.” सिंग यांनी आपल्या जबाबात वैमानिकाच्या कार्यपद्धतीवर प्रश्नचिन्ह उपस्थित केले असून, कंपनीच्या वतीने सर्व सुरक्षा निकषांचे पालन केले जात असल्याचा दावा केला आहे. इतकेच नव्हे तर, “या संपूर्ण प्रकरणात जर माझी किंवा माझ्या कंपनीची काही चूक आढळली, तर मला कोणतीही कठोर शिक्षा भोगायला मी तयार आहे,” असे आव्हानात्मक विधानही त्यांनी तपास यंत्रणेसमोर केले आहे.
कौटुंबिक आरोप आणि तपासाची दिशा-
या प्रकरणाला राजकीय महत्त्व प्राप्त होण्याचे मुख्य कारण म्हणजे अजित पवार यांचे पुतणे आमदार रोहित पवार आणि सुपुत्र जय पवार यांनी यापूर्वीच ‘व्हीएसआर’ कंपनीच्या कारभारावर गंभीर संशय व्यक्त केला होता. विमानाची देखभाल-दुरुस्ती आणि सुरक्षा मानकांकडे कंपनीने दुर्लक्ष केल्याचा आरोप पवार कुटुंबीयांकडून करण्यात आला होता. या पार्श्वभूमीवर, कंपनीच्या मालकाने थेट वैमानिकाला जबाबदार धरल्याने हा वाद आता अधिक चिघळण्याची शक्यता आहे. वैमानिकाची चूक होती की कंपनीची निष्काळजी, याचा शोध आता सीआयडी तांत्रिक तज्ञांच्या मदतीने घेत आहे.
अजित पवार विमान अपघात प्रकरण: “व्ही. के. सिंग यांना पोलिसांकडूनच ‘व्हीआयपी’ वागणूक”; रोहित पवारांचा सीआयडीच्या कार्यपद्धतीवर तीव्र आक्षेप-
माजी उपमुख्यमंत्री अजित पवार यांच्या दुर्दैवी विमान अपघात प्रकरणाच्या तपासाभोवती संशयाचे जाळे अधिक गडद झाले आहे. राष्ट्रवादी काँग्रेसचे (शरद पवार गट) आमदार रोहित पवार यांनी सीआयडी (CID) कार्यालयाला भेट दिल्यानंतर, तपास यंत्रणेच्या कार्यपद्धतीवर गंभीर प्रश्न उपस्थित केले आहेत. अपघातग्रस्त विमानाची मालकी असलेल्या ‘व्हीएसआर’ (VSR) कंपनीचे मालक व्ही. के. सिंग यांना चौकशीच्या नावाखाली चक्क ‘राजेशाही थाट’ (VIP Treatment) देण्यात आल्याचा खळबळजनक आरोप रोहित पवार यांनी केला आहे. यामुळे या प्रकरणातील तपासाच्या निष्पक्षपातीपणावर आता प्रश्नचिन्ह उभे राहिले आहे.
सीआयडी कार्यालयात एके-४७ सह प्रवेश?
रोहित पवार यांनी आपल्या सोशल मीडिया पोस्टमध्ये संताप व्यक्त करताना म्हटले की, “ज्या कंपनीच्या निष्काळजीपणामुळे अजितदादांसारखा मोठा नेता आपण गमावला, त्या कंपनीचा मालक व्ही. के. सिंग जेव्हा सीआयडी कार्यालयात येतो, तेव्हा त्याला विशेष वागणूक दिली जाते. धक्कादायक म्हणजे, सीआयडीसारख्या संवेदनशील कार्यालयात सिंग यांच्या खाजगी सुरक्षा रक्षकांना एके-४७ सारख्या अत्याधुनिक शस्त्रांसह प्रवेश दिला जातो. ज्या आरोपीच्या कंपनीवर गुन्हे दाखल होणे अपेक्षित आहे, त्याला पोलिसांच्याच संरक्षणात काळ्या काचांच्या गाडीतून सन्मानाने बाहेर सोडले जाते, ही बाब अत्यंत संशयास्पद आहे.”
गुन्हा दाखल करण्यास टाळाटाळ का?
तपासातील दिरंगाईवर बोट ठेवताना रोहित पवार म्हणाले की, विमान अपघात तपास ब्युरोचा (AAIB) प्राथमिक अहवाल येऊन आठवडा उलटला आहे. मागील भेटीत सीआयडी अधिकाऱ्यांनी हा अहवाल प्राप्त होताच तात्काळ गुन्हा दाखल करण्याचे आश्वासन दिले होते. मात्र, आजही अधिकार्यांनी गुन्हा नोंदवण्यास स्पष्ट नकार दिला असून, आता ‘अंतिम अहवाल’ येईपर्यंत थांबण्याचे नवीन कारण पुढे केले जात आहे. “व्ही. के. सिंग यांना वाचवण्यासाठी आणि त्यांनी कुणा बड्या नेत्याचे किंवा उद्योगपतीचे नाव घेऊ नये, यासाठीच हा जाणीवपूर्वक वेळकाढूपणा केला जात आहे का?” असा संतप्त सवाल त्यांनी उपस्थित केला आहे.
पाठपुरावा सुरूच राहणार-
रोहित पवार यांनी स्पष्ट केले की, कितीही दबाव टाकला किंवा पुराव्यांशी छेडछाड करण्याचा प्रयत्न केला, तरी या प्रकरणाचा शेवटपर्यंत पाठपुरावा केला जाईल. एकीकडे व्ही. के. सिंग वैमानाकावर दोष ढकलत असताना आणि दुसरीकडे त्यांना मिळणाऱ्या या विशेष वागणुकीमुळे आता हे प्रकरण राजकीय पटलावर अधिकच गाजण्याची चिन्हे आहेत.
“व्ही. के. सिंग यांना नेमकी कोणाची भीती वाटते?”; रोहित पवारांचा संतप्त सवाल; प्रफुल्ल पटेलांच्या भूमिकेवरही डागली तोफे-
अजित पवार यांच्या अपघाती निधनानंतर ‘व्हीएसआर’ विमान कंपनीचे मालक व्ही. के. सिंग यांच्याभोवती तपासाचे चक्र फिरत असतानाच, आमदार रोहित पवार यांनी त्यांच्या वर्तणुकीवर आणि त्यांना मिळणाऱ्या शासकीय राजाश्रयावर सडकून टीका केली आहे. पुणे येथील सीआयडी (CID) कार्यालयात चौकशीसाठी हजर झालेल्या सिंग यांच्या ताफ्यातील सशस्त्र सुरक्षारक्षक आणि त्यांच्या उद्धट भाषेमुळे राजकीय वर्तुळात नवा वाद उफाळून आला आहे. ज्या कंपनीच्या निष्काळजीपणामुळे महाराष्ट्राने एक कर्तबगार नेतृत्व गमावले, त्या कंपनीच्या मालकाचा इतका मोठा ‘थाट’ नेमका कोणाच्या जीवावर सुरू आहे, असा प्रश्न रोहित पवार यांनी उपस्थित केला आहे.
पोलिस कार्यालयात बंदुकधारी रक्षकांचे काय काम?
रोहित पवार यांनी सिंग यांच्या सुरक्षा व्यवस्थेवर आक्षेप घेत म्हटले की, “ज्या व्यक्तीमुळे अजितदादा आपल्यातून हिरावले गेले, तो व्ही. के. सिंग जर खरोखरच निर्दोष असेल, तर त्याला नेमकी कोणाची भीती वाटते? पोलिसांच्याच विभागात आणि तपास यंत्रणेच्या कार्यालयात जाताना त्याला अशा प्रकारे बंदुकधारी अंगरक्षकांचा गराडा घेण्याची गरज का भासते? तो स्वतःला कोणी जागतिक स्तरावरील मोठा नेता समजतो का?” ज्या सीआयडी कार्यालयात सर्वसामान्यांना साधे प्रवेश मिळणे कठीण असते, तिथे सिंग यांची गाडी थेट कार्यालयाच्या प्रवेशद्वारापर्यंत कशी जाते, याबद्दल त्यांनी संताप व्यक्त केला आहे.
“मेरी ऊपर से नीचे तक पहुँच है!”; सिंग यांची उद्दाम भाषा-
सिंग यांच्या उद्धट वागणुकीचा पाढा वाचताना रोहित पवार पुढे म्हणाले की, चौकशीच्या दरम्यान व्ही. के. सिंग यांनी “माझी वरपासून खालपर्यंत ओळख आहे” अशा प्रकारची धमकीवजा आणि उद्धट भाषा वापरली. एका गुन्हेगारी प्रकरणाच्या तपासाला सामोरे जाताना अशा प्रकारचा अहंकार कोठून येतो, असा सवाल करत रोहित पवार यांनी प्रशासनाला जाब विचारला आहे. सिंग यांना मिळणारी ही ‘व्हीआयपी’ वागणूक म्हणजे तपासावर दबाव आणण्याचाच एक प्रकार असल्याचे त्यांनी नमूद केले.
प्रफुल्ल पटेलांवर निशाणा: “स्वार्थ की दादांवरील प्रेम?”
यावेळी रोहित पवार यांनी ज्येष्ठ नेते प्रफुल्ल पटेल यांच्यावरही निशाणा साधला. प्रफुल्ल पटेल यांनी या प्रकरणात घेतलेल्या भूमिकेवर संशय व्यक्त करत त्यांनी विचारले, “तुम्ही खरोखरच अजितदादांचे प्रेमी आहात की स्वतःच्या स्वार्थासाठी या प्रकरणाकडे दुर्लक्ष करत आहात, हे आता महाराष्ट्राला दाखवून देण्याची वेळ आली आहे.
