Kolkata EVM Fire: पश्चिम बंगालची राजधानी कोलकाता येथील अलीपूर भागातून एक धक्कादायक आणि तितकीच खळबळजनक बातमी समोर आली आहे. येथील एका ९ मजली सरकारी इमारतीला भीषण आग लागली. या आगीमध्ये तब्बल 4,000 इलेक्ट्रॉनिक व्होटिंग मशिन्स (EVM) जळून खाक झाल्याची अधिकृत माहिती समोर आली आहे.
तृणमूल काँग्रेसने (TMC) या घटनेवर अत्यंत तीव्र शब्दांत आक्षेप घेतला असून या संपूर्ण प्रकरणाला ‘गूढ’ म्हटले आहे. या दुर्घटनेवरून पक्षाने थेट भारताच्या निवडणूक आयोगाला (ECI) धारेवर धरले असून अनेक गंभीर प्रश्न उपस्थित केले आहेत.
कोणकोणत्या मतदारसंघातील मशिन्स जळाल्या?
तृणमूल काँग्रेसने सोशल मीडिया प्लॅटफॉर्म X वर एक अधिकृत पत्रक जाहीर करून नुकसानीची माहिती दिली आहे. या आगीत खालील साहित्य पूर्णपणे नष्ट झाले आहे:
- 4,000 कंट्रोल युनिट्स, 4,000 बॅलट युनिट्स आणि 4,000 व्हीव्हीपॅट (VVPAT) मशिन्स.
- या सर्व मशिन्स कसबा, जादवपूर, बेहला पूर्व, बेहला पश्चिम, मेटीयाबुर्ज, सातगाछी आणि डायमंड हार्बर उपविभागातील इतर विधानसभा मतदारसंघांशी संबंधित होत्या.
पक्षाने म्हटले आहे की, यापूर्वी ईव्हीएम आणि सीसीटीव्ही फुटेज सुरक्षित ठेवण्यासाठी न्यायालयाची मदत घेण्यात आली होती. असे असतानाही एवढ्या कडक सुरक्षेत ही आग कशी लागली? हा केवळ एक अपघात आहे की लोकशाहीशी छेडछाड करून पुरावे नष्ट करण्याचा ठरवून केलेला कट आहे, असा थेट सवाल तृणमूलने केला आहे.
“ही सामान्य आग नाही”; मंत्र्यांचा घातपाताचा संशय
पश्चिम बंगालचे अग्निशामक आणि आपत्कालीन सेवा राज्यमंत्री कौशिक चौधरी यांनी घटनास्थळाची पाहणी केल्यानंतर माध्यमांशी संवाद साधला. त्यांनी या घटनेमागे घातपाताची भीती व्यक्त केली आहे:
- असामान्य पद्धतीने पसरली आग: मंत्री चौधरी यांनी सांगितले की, आग सुरुवातीला दुसऱ्या आणि तिसऱ्या मजल्यावर लागली होती. मात्र, ती मधले चौथे, पाचवे आणि सहावे मजले सोडून थेट सातव्या, आठव्या आणि नवव्या मजल्यापर्यंत कशी पोहोचली, याचे मोठे आश्चर्य वाटत आहे.
- तपास सुरू: ही आग नैसर्गिक नसून यामागे काही घातपात (SABOTAGE) आहे का, याची चौकशी पोलीस करत आहेत. फॉरेन्सिक रिपोर्ट आल्यानंतरच मूळ कारण स्पष्ट होईल.
२४ तासांनंतरही कुलिंग ऑपरेशन सुरू; एफआयआर दाखल
या नऊ मजली इमारतीमध्ये अनेक सरकारी विभागांसह दक्षिण 24 परगणा जिल्हा परिषदेचे कार्यालय देखील आहे. आग लागल्यापासून जवळपास 24 तास उलटून गेले तरी अग्निशामक दलाचे जवान तिथे तैनात आहेत. वरवर आग विझलेली दिसत असली तरी इमारतीच्या आत काही ठिकाणी अजूनही धूर निघत असून कुलिंग प्रक्रिया सुरू आहे.
याप्रकरणी दक्षिण 24 परगणा जिल्हा प्रशासनाच्या अप्पर जिल्हाधिकाऱ्यांनी (ADM) अलीपूर पोलीस ठाण्यात अधिकृत तक्रार दिली आहे. पोलिसांनी याप्रकरणी एफआयआर (FIR) नोंदवून सखोल तपास सुरू केला आहे. शॉर्ट सर्किट की इतर काही कारण, या सर्व बाजूंनी पोलीस शोध घेत असून फॉरेन्सिक टीम लवकरच घटनास्थळावरून नमुने गोळा करणार आहे.
