Sushant Shelar : अखिल भारतीय मराठी चित्रपट महामंडळाच्या निवडणुकीतील रणकंदन आता अधिकच तीव्र झाले असून, ज्येष्ठ अभिनेते विजय पाटकर यांनी केलेल्या आरोपांना शिवसेना नेते आणि अभिनेते सुशांत शेलार यांनी जशास तसे उत्तर दिले आहे. राज्यातील राजकीय वातावरण विधानपरिषद निवडणुकांमुळे तापलेले असतानाच, कलाक्षेत्रातील या निवडणुकीतही राजकीय हस्तक्षेपाचे आरोप होऊ लागले आहेत. “मला उमेदवारी अर्ज भरण्यापासून रोखण्यात आले असून एका मंत्र्यांचे विशेष कार्य अधिकारी (OSD) कोल्हापुरात तळ ठोकून दबाव टाकत आहेत,” या विजय पाटकरांच्या विधानाचा शेलार यांनी तीव्र शब्दांत निषेध केला. पाटकरांचे संचालकपद न्यायालयाने आधीच रद्द केले असल्याचे सांगत, त्यांनी केलेले दबावाचे सर्व आरोप बिनबुडाचे आणि दिशाभूल करणारे असल्याचे शेलार यांनी स्पष्ट केले.
या वादात सुशांत शेलार यांनी केवळ बचावात्मक पवित्रा न घेता, विजय पाटकरांच्या पूर्वीच्या कार्यकाळातील कथित आर्थिक गैरव्यवहारांची लक्तरे वेशीवर टांगली आहेत. ‘मानाचा मुजरा’ या कार्यक्रमाच्या आयोजनात मोठ्या प्रमाणावर भ्रष्टाचार झाल्याचा गंभीर दावा शेलार यांनी केला. साधारण १५ ते १६ लाख रुपयांत पूर्ण होणारा हा सोहळा तब्बल ५७ लाख रुपयांपर्यंत कसा फुगवण्यात आला, असा सवाल त्यांनी उपस्थित केला. इतकेच नव्हे तर लेखापरीक्षणामध्ये (ऑडिट) १० लाख ७८ हजार रुपयांची तफावत आढळल्याचे सांगून, पाटकरांनी गेल्या दहा वर्षांत महामंडळाच्या माध्यमातून स्वतःच्या मालमत्ता उभारल्याचा खळबळजनक आरोपही त्यांनी केला. धर्मादाय आयुक्तांनी खर्चावर नियंत्रण ठेवण्याचे निर्देश दिल्याने काही विकासकामे थांबली होती, असे सांगत त्यांनी सध्याच्या व्यवस्थापनाची बाजू लावून धरली.
या प्रकरणावरून शिवसेना (उद्धव बाळासाहेब ठाकरे) पक्षाच्या उपनेत्या सुषमा अंधारे यांनी सत्ताधारी नेत्यांवर केलेल्या टीकेलाही सुशांत शेलार यांनी चोख प्रत्युत्तर दिले. अंधारे यांनी “नेते आता कलाकारांचे हक्काचे क्षेत्र बळकावत आहेत” असे म्हणत सरकारवर निशाणा साधला होता. त्यावर शेलार यांनी पलटवार करताना म्हटले की, “नीलम शिर्के या प्रदीर्घ काळापासून अभिनय क्षेत्रात कार्यरत आहेत, त्यामुळे त्यांना निवडणूक लढवण्याचा पूर्ण अधिकार आहे.” यासह त्यांनी सुषमा अंधारे यांच्यावर वैयक्तिक टीका करताना, “मान वाकडी करून बोलल्यामुळे कुणी अभिनेत्री होत नाही, हवे तर तुम्ही स्वतः अभिनेत्री व्हा आणि मगच या निवडणुकीत उतरा,” असा खोचक टोला लगावला.
चित्रपट महामंडळाच्या या निवडणुकीने आता पूर्णतः राजकीय स्वरूप धारण केले असून, व्यावसायिक वादाचे रूपांतर वैयक्तिक चिखलफेकीत झाले आहे. एका बाजूला विजय पाटकरांसारखे ज्येष्ठ कलाकार अन्यायाची ओरड करत आहेत, तर दुसरीकडे सुशांत शेलार यांनी पुराव्यांसह भ्रष्टाचाराचे मुद्दे उपस्थित करून जुन्या हिशोबांची उजळणी सुरू केली आहे. अभिनेत्री नीलम शिर्के यांच्या उमेदवारीवरून सुरू असलेला हा कलगीतुरा आगामी काळात अधिकच चिघळण्याची चिन्हे दिसत आहेत. कलाक्षेत्रातील शुचिर्भूतपणा जपण्याऐवजी तिथे सुरू असलेला हा ‘राजकीय ड्रामा’ पाहून मराठी चित्रपटसृष्टीतील जाणकार व्यक्तींनी मात्र चिंता व्यक्त केली आहे.
