Chandrashekhar Bawankule : महाराष्ट्राच्या मुख्यमंत्रिपदावरून सत्ताधारी आणि विरोधकांमध्ये सध्या जोरदार कलगीतुरा रंगला आहे. शिवसेना (यूबीटी) खासदार संजय राऊत यांनी राज्यातील नेतृत्वबदलाबाबत केलेल्या विधानाला भाजपचे ज्येष्ठ नेते आणि महसूलमंत्री चंद्रशेखर बावनकुळे यांनी चोख प्रत्युत्तर दिले आहे. “राज्यामध्ये देवेंद्र फडणवीस हेच 2034 पर्यंत मुख्यमंत्री पदावर कायम राहतील,” असा एक मोठा दावा बावनकुळे यांनी केला आहे.
यापूर्वी संजय राऊत यांनी, “देवेंद्र फडणवीस जर ज्येष्ठ मंत्री म्हणून दिल्लीत गेले, तर महाराष्ट्राचे मुख्यमंत्रिपद चंद्रशेखर बावनकुळे यांच्याकडे येईल, असे मला 100 टक्के वाटते,” असे म्हटले होते. तसेच फडणवीसांनी 2029 पूर्वी देशाचे पंतप्रधान व्हावे, अशी टिप्पणीही त्यांनी केली होती. राऊतांच्या या विधानामुळे सुरू झालेल्या राजकीय चर्चांवर पडदा टाकताना बावनकुळे यांनी फडणवीस यांच्या नेतृत्वावर शिक्कामोर्तब केले आहे.
१४ कोटी जनतेची हीच भावना; बावनकुळेंकडून मुख्यमंत्र्यांचे कौतुक
चंद्रशेखर बावनकुळे यांनी देवेंद्र फडणवीस यांच्या पाठीशी खंबीरपणे उभे राहत विरोधकांना सुनावले आहे. देवेंद्र फडणवीस हे अत्यंत अष्टपैलू कर्तृत्वाचे धनी असून तेच राज्याचे नेतृत्व करत आहेत. महाराष्ट्रातील 14 कोटी जनतेचीही हीच भावना आहे की, राज्याला मुख्यमंत्री म्हणून देवेंद्र फडणवीस यांचेच नेतृत्व लाभावे.
बावनकुळे यांच्या या विधानामुळे महायुतीच्या अंतर्गत समीकरणांबाबत राजकीय वर्तुळात पुन्हा नवीन चर्चा सुरू झाल्या असून, आता यावर विरोधक काय भूमिका घेतात याकडे सर्वांचे लक्ष लागले आहे.
मदतकार्यात राजकारण नको! मोशी दुर्घटनेवरील आरोपांना उत्तर
राजकीय घडामोडींसोबतच, चंद्रशेखर बावनकुळे यांनी मोशी येथे घडलेल्या दुर्दैवी दुर्घटनेवरून विरोधकांनी केलेल्या टीकेचा चांगलाच समाचार घेतला. मोशी दुर्घटनेनंतर विरोधकांकडून मदतकार्य संथ गतीने सुरू असल्याचा आरोप केला जात होता.
या आरोपांना उत्तर देताना बावनकुळे खालील मुद्दे मांडले:
१. सरकार युद्धपातळीवर सक्रिय: केवळ आरोप करणे हे विरोधकांचे कामच आहे. मात्र, ही अत्यंत मोठी घटना असून ढिगाऱ्याखाली अडकलेल्या लोकांना वाचवणे आणि पीडितांना मदत देणे याला सरकारचे पहिले प्राधान्य आहे.
२. सर्व यंत्रणा एकत्र: घटनास्थळावर महाराष्ट्र सरकार, स्थानिक जिल्हाधिकारी, पालिकेची यंत्रणा आणि आपत्ती व्यवस्थापन पथके (डिझास्टर मॅनेजमेंट टीम) पूर्ण क्षमतेने काम करत आहेत.
३. प्रशासनाची कटिबद्धता: विरोधकांनी कितीही दावे केले, तरी सरकार लोकांना वाचवण्यासाठी आणि त्यांना तात्काळ मदत देण्यासाठी पूर्णपणे कटिबद्ध असून प्रशासकीय यंत्रणा अहोरात्र कार्यरत आहे, असे त्यांनी स्पष्ट केले.
