Apple Back to School Sale: अॅपल कंपनीने अलीकडेच आपल्या अनेक प्रीमियम उपकरणांच्या किमतींमध्ये मोठी वाढ केली आहे. यामध्ये नवीन एम5 प्रोसेसर असलेले मॅकबुक एअर, एम5 प्रो आणि एम5 मॅक्स चिपसेट सिरीजचे मॅकबुक प्रो तसेच आयपॅड एअर आणि आयपॅड प्रो यांसारख्या साधनांचा समावेश आहे.
या वाढलेल्या किमतींमुळे ग्राहकांच्या खिशाला कात्री बसत असतानाच, कॉलेजचे विद्यार्थी, शिक्षक आणि पालकांसाठी एक अत्यंत आनंदाची बातमी समोर आली आहे. अॅपलने आपली अत्यंत लोकप्रिय ‘बॅक टू स्कूल’ वार्षिक सेल भारतात अधिकृतपणे सुरू केली आहे.
टेक जगतातील आघाडीच्या अॅपल कंपनीने जाहीर केले आहे की, ही विशेष सेल भारतात 27 ऑगस्ट 2026 पर्यंत सुरू राहील. या कालावधीत शिक्षण क्षेत्राशी संबंधित ग्राहकांना केवळ सवलतीच्या दरात अॅपलची उत्पादने खरेदी करता येणार नाहीत, तर त्यासोबत एअरपॉड्स 4, अॅपल पेन्सिल किंवा एअरटॅग्स यांसारख्या महागड्या अॅक्सेसरीज पूर्णपणे मोफत मिळवता येतील.
मॅकबुक मॉडेल्सवर मिळतोय बंपर डिस्काउंट; मोफत एअरपॉड्सची ऑफर
या सेलमध्ये मॅकबुक खरेदी करणाऱ्या विद्यार्थ्यांसाठी अॅपलने खालीलप्रमाणे किमती आणि ऑफर्स जाहीर केल्या आहेत:
- मॅकबुक एअर एम5: एम5 प्रोसेसरसह येणारा नवीन 2026 चा मॅकबुक एअर मॉडेल विद्यार्थी सवलतीनंतर 1,37,900 रुपयांच्या सुरुवातीच्या किमतीत उपलब्ध आहे. या खरेदीवर ग्राहक बेस व्हेरिएंटचे एअरपॉड्स 4 किंवा 4 एअरटॅग्सचा पॅक मोफत निवडू शकतात. तसेच 5,000 रुपये अतिरिक्त देऊन नॉईज कॅन्सलेशन फिचर असलेले एअरपॉड्स 4 किंवा 13,000 रुपये देऊन एअरपॉड्स प्रो 3 वर अपग्रेड करू शकतात.
- मॅकबुक प्रो सिरीज: एम5 चिपसेट असलेला 2025 चा मॅकबुक प्रो मॉडेल 2,27,900 रुपयांच्या सुरुवातीच्या किमतीत मिळत आहे. याशिवाय 2026 मध्ये लाँच झालेले एम5 प्रो आणि एम5 मॅक्स प्रोसेसरचे मॉडेल अनुक्रमे 2,81,900 रुपये आणि 4,62,900 रुपयांना उपलब्ध आहेत. या मॉडेल्ससोबतही एअरपॉड्स 4 किंवा 4 एअरटॅग्सचा पॅक मोफत दिला जात आहे.
आयपॅड आणि नवीन मॅकबुक निओवर १०,००० रुपयांची थेट सूट
टॅबलेट आणि बजेट लॅपटॉप खरेदी करू इच्छिणाऱ्या युजर्ससाठी देखील अॅपलने तगड्या डील्स आणल्या आहेत:
- आयपॅड एअर आणि प्रो: एम4 चिपसेटसह येणारा 2025 चा आयपॅड एअर मॉडेल सवलतीनंतर 83,900 रुपयांना उपलब्ध आहे, तर आयपॅड प्रो 2025 मॉडेल 1,27,900 रुपयांना खरेदी करता येईल. या दोन्ही उपकरणांसोबत अॅपल पेन्सिल प्रो पूर्णपणे मोफत दिली जात आहे. ग्राहक हवे असल्यास अल्प अतिरिक्त शुल्क देऊन एअरटॅग्स किंवा एअरपॉड्सचे इतर मॉडेल्स देखील खरेदी करू शकतात.
- मॅकबुक निओ वरील फ्लॅट डिस्काउंट: अॅपलच्या नुकत्याच लाँच झालेल्या आणि ए18 प्रो चिपसेटवर चालणाऱ्या मॅकबुक निओच्या 256GB बेस मॉडेलवर थेट 10,000 रुपयांची फ्लॅट सूट मिळत असून ते 69,900 रुपयांना उपलब्ध आहे. तसेच याचे 512GB स्टोरेज असणारे टच आयडी व्हेरिएंट 79,900 रुपयांना खरेदी करता येईल.
अॅपलची ही स्टुडंट डिस्काउंट ऑफर अॅपल स्टोअरवर वर्षभर उपलब्ध असतेच, परंतु या विशेष सेलच्या काळात मोफत मिळणाऱ्या महागड्या गिफ्ट्समुळे विद्यार्थ्यांना याचा खूप मोठा फायदा होणार आहे.
