Rajdhani Express Fire : तिरुवनंतपुरम-हजरत निजामुद्दीन राजधानी एक्सप्रेसच्या (Rajdhani Express) एसी डब्याला रविवारी पहाटे अचानक आग (Fire) लागल्याची गंभीर घटना मध्य प्रदेशातील रतलाम जिल्ह्यात घडली. या घटनेमुळे ट्रेनमधील प्रवाशांमध्ये काही काळ भीती आणि गोंधळाचे वातावरण निर्माण झाले. मात्र, रेल्वे प्रशासनाच्या तत्परतेमुळे सर्व प्रवाशांची सुरक्षित सुटका करण्यात आली असून कोणतीही जीवितहानी झालेली नाही.
ट्रेन क्रमांक १२४३१ ही राजधानी एक्सप्रेस दिल्लीकडे जात असताना पहाटे सुमारे ५.१५ वाजण्याच्या सुमारास पश्चिम मध्य रेल्वेच्या (West Central Railway) कोटा विभागातील लुनी रिच्छा आणि विक्रमगढ अलोट स्थानकांदरम्यान ही दुर्घटना घडली. ट्रेनच्या बी-१ एसी डब्यात अचानक धूर निघू लागल्यानंतर काही क्षणांतच आगीने उग्र रूप धारण केले. त्यानंतर आगीची झळ शेजारच्या आणखी दोन डब्यांपर्यंत पोहोचल्याने प्रवाशांमध्ये घबराट (Panic) पसरली.
घटनेची माहिती मिळताच रेल्वे प्रशासन, स्थानिक कर्मचारी आणि आपत्कालीन पथक (Emergency Team) तातडीने घटनास्थळी दाखल झाले. सर्वप्रथम प्रभावित डब्यातील प्रवाशांना सुरक्षितपणे खाली उतरवण्यात आले. परिस्थिती नियंत्रणात आणण्यासाठी रेल्वे अधिकाऱ्यांनी त्वरित हालचाली सुरू केल्या. त्यामुळे मोठा अनर्थ टळल्याचे सांगितले जात आहे.
या दुर्घटनेत कोणतीही जीवितहानी किंवा गंभीर दुखापत झालेली नसल्याने प्रवाशांनी सुटकेचा निश्वास सोडला. काही प्रवाशांना किरकोळ त्रास जाणवल्याची माहिती मिळत असली तरी कोणतीही गंभीर परिस्थिती निर्माण झाली नाही.
पश्चिम मध्य रेल्वेचे मुख्य जनसंपर्क अधिकारी (Chief Public Relations Officer) हर्षित श्रीवास्तव यांनी दिलेल्या माहितीनुसार, आग लागल्यानंतर तात्काळ ओव्हरहेड वायरचा वीजपुरवठा (Power Supply) बंद करण्यात आला. तसेच सुरक्षेच्या दृष्टीने आग लागलेला बी-१ डबा ट्रेनपासून वेगळा करण्यात आला.
रेल्वे प्रशासन आणि अग्निशमन विभागाच्या (Fire Brigade) मदतीने आग आटोक्यात आणण्यात यश आले. त्यानंतर सकाळी सुमारे ९.४८ वाजता ही राजधानी एक्सप्रेस डिझेल इंजिनच्या सहाय्याने विक्रमगढ अलोट स्थानकाकडे रवाना करण्यात आली. दरम्यान, आग लागण्याचे नेमके कारण अद्याप स्पष्ट झाले नसून रेल्वेकडून या घटनेची चौकशी (Investigation) सुरू करण्यात आली आहे.
हे देखील वाचा –
जरांगेंचे पुन्हा आंदोलन ! मात्र मुंबईत येणार नाही ! हा एकनाथ शिंदेंचा माणूस! सदावर्तेंचा गंभीर आरोप
