Twisha Sharma Death Case: हायकोर्टाच्या दणक्यानंतर निवृत्त न्यायमूर्ती गिरीबाला सिंह यांना सीबीआयकडून अटक! सुनेच्या संशयास्पद मृत्यू प्रकरणाला मोठे वळण

Twisha Sharma Death Case: मध्य प्रदेशातील हायप्रोफाईल त्विशा शर्मा मृत्यू प्रकरणात एक अत्यंत मोठी घडामोड समोर आली आहे. केंद्रीय अन्वेषण विभागाने म्हणजेच सीबीआयने या प्रकरणातील मुख्य आरोपी आणि निवृत्त न्यायमूर्ती गिरीबाला सिंह यांना अटक केली आहे.

बुधवारी उशिरा मध्य प्रदेश उच्च न्यायालयाने गिरीबाला सिंह यांचा अटकपूर्व जामीन रद्द केला होता. त्यानंतर २४ तास उलटण्याच्या आतच सीबीआयने ही कारवाई केली. याआधी भोपाळच्या कनिष्ठ न्यायालयाने त्यांना तात्पुरता दिलासा दिला होता, जो हायकोर्टाने पूर्णपणे फेटाळून लावला आहे.

Twisha Sharma Death Case: नेमके काय आहे हे प्रकरण?

या प्रकरणाची पार्श्वभूमी आणि कायदेशीर कलमे खालीलप्रमाणे आहेत:

• संशयास्पद मृत्यू: निवृत्त न्यायमूर्तींची सून त्विशा शर्मा हिचा मृतदेह 12 मे रोजी संशयास्पद स्थितीत आढळून आला होता.
• गुन्हा दाखल: याप्रकरणी 15 मे रोजी पोलिसात गुन्हा नोंदवण्यात आला. त्याच दिवशी भोपाळच्या सत्र न्यायालयाने सासू गिरीबाला सिंह यांना अंतरिम जामीन मंजूर केला होता.
• पती कोठडीत: गिरीबाला सिंह यांचा मुलगा आणि मृत त्विशाचा पती समर्थ सिंह हा आधीपासूनच सीबीआयच्या कोठडीत असून त्याची चौकशी सुरू आहे.
• लागू करण्यात आलेली कलमे: उच्च न्यायालयाने दिलेल्या आदेशानुसार, आरोपींवर नवीन भारतीय न्याय संहितेच्या कलम 80(2), 85, 3(5) आणि हुंडा प्रतिबंधक कायद्याच्या कलम 3 आणि 4 अंतर्गत गुन्हा दाखल करण्यात आला आहे.

Twisha Sharma Death Case: पीडितेच्या वडिलांनी मानले न्यायालयाचे आभार

गिरीबाला सिंह यांचा जामीन रद्द झाल्यानंतर ट्विशाचे वडील नवनिधी शर्मा यांनी न्यायव्यवस्थेचे आभार मानले आहेत. न्याय मिळवण्यासाठी सुरू असलेल्या या लढ्यात सोबत असलेल्या प्रत्येकाप्रती त्यांनी कृतज्ञता व्यक्त केली.

प्रसारमाध्यमांशी बोलताना नवनिधी शर्मा म्हणाले, “हा आमच्या न्यायाच्या लढ्यातील केवळ पहिला टप्पा आहे. देशाचे सर्वोच्च न्यायालय आणि भारताच्या सरन्यायाधीशांनी या प्रकरणाची स्वतःहून दखल घेतली, त्याबद्दल मी त्यांचा ऋणी आहे.”

Twisha Sharma Death Case: समाजाला एक मोठा संदेश

हायकोर्टाच्या या निर्णयामुळे समाजात एक अतिशय सकारात्मक संदेश गेला असल्याचे शर्मा यांनी सांगितले. निवृत्त न्यायमूर्तींसारख्या मोठ्या पदावर राहिलेल्या व्यक्तीलाही कायद्यासमोर झुकून कारवाईला सामोरे जावे लागत असल्यामुळे सर्वसामान्यांचा न्यायव्यवस्थेवरील विश्वास वाढेल, असे ते म्हणाले. या संपूर्ण प्रकरणाचा तपास सीबीआय करत असून, ते लवकरच संपूर्ण सत्य लोकांसमोर आणतील, असा विश्वासही त्यांनी व्यक्त केला.

हे देखील वाचा – NEET UG Re Exam 2026: नीट पेपर लीक रोखण्यासाठी आता थेट वायुसेनेची मदत! 21 जूनच्या परीक्षेसाठी केंद्र सरकारचा मोठा प्लॅन