KL Rahul Record: दिल्लीच्या अरुण जेटली स्टेडियमवर शनिवारी केएल राहुल नावाचे वादळ घोंघावले. पंजाब किंग्सविरुद्धच्या सामन्यात दिल्ली कॅपिटल्सच्या या सलामीवीराने केवळ धावांचा पाऊस पाडला नाही, तर आयपीएलच्या इतिहासातील अनेक मोठे विक्रम मोडीत काढले. राहुलने ६७ चेंडूत नाबाद १५२ धावांची खेळी केली, ज्यामुळे दिल्लीने २६४ धावांचा डोंगर उभा केला.
भारतीय फलंदाजाचा सर्वोच्च वैयक्तिक स्कोअर
केएल राहुल आता आयपीएलमध्ये १५० धावांचा टप्पा ओलांडणारा पहिला भारतीय फलंदाज ठरला आहे. यापूर्वी हा विक्रम अभिषेक शर्माच्या (१४१ धावा) नावावर होता, जो राहुलने सहज मागे टाकला. आयपीएल इतिहासातील भारतीयांच्या पाच सर्वोच्च धावसंख्या आता खालीलप्रमाणे आहेत:
- *केएल राहुल – १५२ **
- अभिषेक शर्मा – १४१
- अभिषेक शर्मा – १३५
- *केएल राहुल – १३२ **
- शुभमन गिल – १२९
१५ वर्षांपूर्वीचा सेहवागचा विक्रम मोडला
केएल राहुलने अवघ्या ४७ चेंडूत आपले शतक पूर्ण केले. हे दिल्ली कॅपिटल्सच्या कोणत्याही फलंदाजाकडून करण्यात आलेले सर्वात वेगवान शतक आहे. या पराक्रमासह राहुलने वीरेंद्र सेहवागचा १५ वर्षांपूर्वीचा विक्रम मोडला. सेहवागने २०११ मध्ये ४८ चेंडूत शतक ठोकले होते. राहुलने आपल्या या खेळीत १६ चौकार आणि ९ उत्तुंग षटकार लगावले.
वेगवेगळ्या संघांसाठी सहावे शतक
या शतकासह राहुलने आयपीएलमध्ये ख्रिस गेलच्या ६ शतकांच्या विक्रमाशी बरोबरी केली आहे. आता त्याच्या पुढे केवळ विराट कोहली (८) आणि जोस बटलर (७) आहेत. विशेष म्हणजे, आयपीएलमधील तीन वेगवेगळ्या फ्रँचायझींसाठी (पंजाब किंग्स, लखनऊ सुपर जायंट्स आणि दिल्ली कॅपिटल्स) प्रत्येकी २ शतके झळकावणारा तो इतिहासातील पहिलाच फलंदाज ठरला आहे.
मैदानावर गाजवले वर्चस्व
राहुलने सुरुवातीला संयमी खेळ केला, मात्र एकदा का लय सापडल्यानंतर त्याने पंजाबच्या गोलंदाजांचा समाचार घेतला. त्याने ५० ते १०० हा प्रवास केवळ २१ चेंडूत आणि १०० ते १५२ हा प्रवास अवघ्या २० चेंडूत पूर्ण केला. मैदानाबाहेर जाताना दिल्लीच्या चाहत्यांनी त्याला उभे राहून मानवंदना दिली. या ऐतिहासिक खेळीनंतर राहुलने आपल्या मुलीला एक विशेष मानवंदना (Tribute) अर्पण करत हे यश साजरे केले.
दरम्यान, दिल्लीने विजयासाठी ठेवलेले 265 धावांचे डोंगरसमान आव्हान पाहून अनेकांना हा सामना दिल्लीच्या खिशात वाटत होता. मात्र, पंजाबच्या फलंदाजांनी अशक्य वाटणारी गोष्ट शक्य करून दाखवली.
पंजाबकडून प्रभसिमरन सिंगने अवघ्या 26 चेंडूत 76 धावांची आक्रमक खेळी करून विजयाचा पाया रचला. त्याला प्रियांश आर्याने 17 चेंडूत 43 धावा करून उत्तम साथ दिली.अखेरच्या टप्प्यात कर्णधार श्रेयस अय्यरने 36 चेंडूत नाबाद 71 धावा करत 18.5 षटकांतच पंजाबला विजय मिळवून दिला.
पंजाब किंग्सने या विजयासह आयपीएलच्या इतिहासातील सर्वात मोठ्या धावसंख्येचा यशस्वी पाठलाग करण्याचा विक्रम आपल्या नावावर केला आहे.
