Hybrid Cars India: पेट्रोल आणि डिझेलच्या गगनाला भिडलेल्या किमती आणि इलेक्ट्रिक गाड्यांच्या चार्जिंगची कटकट किंवा रेंज संपण्याची भीती, यामुळे सध्या अनेक जण गाडी खरेदी करताना संभ्रमात आहेत. अशा परिस्थितीत ‘हाइब्रिड’ तंत्रज्ञान असलेल्या कार ग्राहकांसाठी एक परफेक्ट पर्याय म्हणून समोर येत आहेत.
या गाड्यांमध्ये पेट्रोल इंजिन आणि इलेक्ट्रिक मोटर एकत्र काम करतात, ज्यामुळे इंधनाची मोठी बचत होते आणि रेंज संपण्याची अजिबात चिंता नसते. तुम्हीही जर ऑफिसला ये-जा करण्यासाठी एक ‘पैसा वसूल’ गाडी शोधत असाल, तर भारतीय बाजारात उपलब्ध असलेल्या या 5 सर्वोत्तम हाइब्रिड कार तुमच्यासाठी उत्तम पर्याय ठरू शकतात.
1. मारुती सुजुकी ग्रँड विटारा (Maruti Suzuki Grand Vitara)
मारुतीची ही एसयूव्ही ऑफिसला जाणाऱ्या नोकरदारांची पहिली पसंती बनली आहे. यात 1.5 लिटरचे पेट्रोल इंजिन आणि एक इलेक्ट्रिक मोटर देण्यात आली आहे, जी प्रति लिटर 27.97 किमी इतके जबरदस्त मायलेज देते. शहरातील भारी ट्रॅफिकमध्ये ही कार अनेकदा पूर्णपणे इलेक्ट्रिक मोडवर चालते, ज्यामुळे पेट्रोलचा खर्च प्रचंड प्रमाणात कमी होतो. या कारची सुरुवातीची एक्स-शोरूम किंमत सुमारे 16.63 लाख रुपयांपासून सुरू होते.
2. टोयोटा अर्बन क्रूझर हायराइडर (Toyota Urban Cruiser Hyryder)
टोयोटा आणि मारुतीच्या भागीदारीतून तयार झालेली ही कार ग्राहकांसाठी अत्यंत विश्वासार्ह मानली जाते. हायराइडरमध्ये देखील ग्रँड विटारासारखेच 1.5 लिटरचे हाइब्रिड इंजिन मिळते, जे 27.97 किमी प्रति लिटरचा मायलेज देते. या कारची उत्तम बिल्ड क्वालिटी आणि स्टायलिश लुक ऑफिसच्या पार्किंगमध्ये उठून दिसतो. या कारच्या हाइब्रिड व्हेरियंटची किंमत साधारणपणे 16.77 लाख रुपयांपासून सुरू होते.
3. होंडा सिटी ई:एचईव्ही (Honda City e:HEV)
तुम्हाला जर एसयूव्ही ऐवजी एक आरामदायक सेडान कार आवडत असेल, तर होंडा सिटी हाइब्रिड तुमच्यासाठी सर्वोत्तम आहे. ही कार प्रति लिटर 27.1 किमी मायलेज देते. ऑफिसच्या धावपळीनंतर या कारमधील शांत आणि आरामदायक केबिन प्रवासाचा थकवा दूर करते. सुरक्षेसाठी यात अॅडव्हान्स ड्रायव्हर असिस्टन्स सिस्टम म्हणजेच ‘ADAS’ सारखे हाय-टेक फीचर्स मिळतात. याची एक्स-शोरूम किंमत 19.99 लाख रुपयांपासून सुरू होते.
4. टोयोटा इनोवा हायक्रॉस (Toyota Innova Hycross)
मोठे कुटुंब आणि आरामदायी प्रवासासाठी इनोवा हायक्रॉसला तोड नाही. या मोठ्या गाडीत 2.0 लिटरचे हाइब्रिड इंजिन आहे, जे एवढी मोठी कार असूनही प्रति लिटर 23.24 किमी इतका उत्तम मायलेज देते. ऑफिसला जाण्यासोबतच लांबच्या प्रवासासाठी किंवा वीकेंड ट्रिपसाठी ही कार राजा मानली जाते. यात मोठी सनरूफ आणि प्रिमियम केबिन मिळते. याची किंमत 26.76 लाख रुपयांपासून सुरू होते.
5. मारुती सुजुकी इनव्हिक्टो (Maruti Suzuki Invicto)
ही कार टोयोटा इनोवा हायक्रॉसचेच मारुती व्हर्जन आहे. मायलेजच्या बाबतीत ही गाडी देखील तितकीच दमदार असून प्रति लिटर 23.24 किमी मायलेज देते. ज्यांना मारुतीच्या मोठ्या सर्व्हिस नेटवर्कच्या विश्वासासोबत एक प्रिमियम आणि आलिशान हाइब्रिड गाडी हवी आहे, त्यांच्यासाठी हा एक उत्तम सौदा आहे. याची एक्स-शोरूम किंमत 24.97 लाख रुपयांपासून सुरू होते.
हे देखील वाचा – PM Modi on Foreign Travel Tax: परदेश प्रवासावर नवीन कर लागणार? सोशल मीडियावरील ‘त्या’ चर्चेवर स्वतः पंतप्रधान मोदींनी दिले स्पष्टीकरण
