Mumbai Pune Expressway Missing Link : मुंबई आणि पुणे या दोन शहरांना अधिक जवळ आणणारा महत्त्वाकांक्षी ‘मिसिंग लिंक’ प्रकल्प आता वाहतुकीसाठी सज्ज झाला आहे. १ मे रोजी महाराष्ट्र दिनाचे औचित्य साधून मुख्यमंत्री देवेंद्र फडणवीस यांच्या हस्ते या मार्गाचे उद्घाटन करण्यात येणार आहे. या नवीन मार्गामुळे घाटातील धोकादायक वळणे मागे पडणार असून प्रवाशांचा वेळ आणि इंधन दोन्ही वाचणार आहे.
प्रवासाचा वेळ आणि अंतर कमी होणार
‘मिसिंग लिंक’ सुरू झाल्यामुळे मुंबई-पुणे द्रुतगती मार्गावरील अंतर सुमारे ६ किलोमीटरने कमी होईल. सर्वात महत्त्वाचे म्हणजे खंडाळा घाटातील अवघड वळणे बायपास झाल्यामुळे प्रवासाचा वेळ २० ते ३० मिनिटांनी वाचणार आहे. यामुळे घाटातील अपघातांचे प्रमाणही लक्षणीयरीत्या कमी होईल, अशी अपेक्षा आहे.
वेगमर्यादेचे नवे नियम
मिसिंग लिंकवरील सुरक्षिततेसाठी सरकारने वेगमर्यादेची अधिसूचना जारी केली आहे:
- हलकी चारचाकी वाहने (LMV): ताशी १०० किलोमीटर.
- बस आणि प्रवासी वाहने: ताशी ८० किलोमीटर.
वाहतुकीचे नियोजन: दोन टप्प्यांत अंमलबजावणी
प्रशासनाने या मार्गावरील वाहतूक टप्प्याटप्प्याने सुरू करण्याचा निर्णय घेतला आहे:
१. पहिला टप्पा (१ मे २०२६ ते ३१ ऑक्टोबर २०२६): या काळात केवळ हलकी वाहने आणि बस/प्रवासी वाहनांनाच प्रवेश दिला जाईल. अवजड मालवाहू वाहनांना या मार्गावर सध्या बंदी असेल.
२. दुसरा टप्पा (१ नोव्हेंबर २०२६ पासून): पहिल्या सहा महिन्यांच्या निरीक्षणांनंतर मालवाहू वाहनांना प्रवेश देण्याबाबत निर्णय घेतला जाईल.
३. कायमस्वरूपी बंदी: ज्वलनशील, स्फोटक किंवा धोकादायक वस्तू वाहून नेणाऱ्या वाहनांना या मार्गावर पूर्णतः बंदी असेल.
टोलमध्ये वाढ नाही
प्रवाशांसाठी दिलासादायक बाब म्हणजे या नवीन प्रकल्पामुळे टोलच्या दरात कोणतीही वाढ करण्यात आलेली नाही. खालापूर टोल नाक्यावरही सध्याचेच दर लागू राहतील. सुमारे ६,७०० कोटी रुपये खर्चून उभारलेल्या या प्रकल्पाला २०१९ मध्ये मंजुरी मिळाली होती.
हे देखील वाचा –
Fuel Price Update: पेट्रोल-डिझेलच्या किंमतीत वाढ होणार का? सरकारने दिले स्पष्टीकरण
