Nida Khan : नाशिकमधील एका बहुराष्ट्रीय कंपनीत कार्यरत असलेल्या अविवाहित तरुणीवर ओढवलेला बलात्कार आणि तिचे सक्तीने धर्मांतर करण्याच्या प्रयत्नाचे प्रकरण आता निर्णायक वळणावर पोहोचले आहे. या प्रकरणातील मुख्य संशयित निदा एजाज खान हिने तिच्या नातेवाईकांसोबत केलेल्या मोबाइल संभाषणातून (चॅटिंग) अनेक खळबळजनक बाबी समोर आल्या आहेत. विशेष तपास पथकाच्या (एसआयटी) हाती लागलेल्या पुराव्यांनुसार, निदाने तिच्या नातलगाशी संवाद साधताना पीडितेचा उल्लेख ‘हानिया’ असा केला होता. “आज हानियासोबत बाहेर जात आहे,” असा निदाचा संदेश वाचून जेव्हा समोरून “हानिया कोण?” अशी विचारणा झाली, तेव्हा निदाने “जिचे धर्मांतर झाले आहे तीच,” असे उत्तर दिल्याचे तपासात निष्पन्न झाले आहे. यावरून पीडितेचे नामकरण करून तिला धर्मांतराच्या जाळ्यात ओढण्याचा पद्धतशीर कट आखण्यात आल्याचे स्पष्ट होत आहे.
या गंभीर खटल्याची पहिली सुनावणी आज, सोमवारी (दि. २५ मे) नाशिकरोड येथील अतिरिक्त सत्र न्यायालयात पार पडणार आहे. या गुन्ह्याचा तपास करणाऱ्या विशेष तपास पथकाने न्यायालयात सुमारे १५०० पानांचे सर्वंकष दोषारोपपत्र दाखल केले असून, त्यानंतर न्यायालयाने तातडीने सुनावणीचे आदेश दिले आहेत. देवळाली कॅम्प पोलीस ठाण्यात २६ मार्च रोजी दाखल झालेल्या गुन्ह्यानुसार, दानिश शेख, तौसिफ अत्तार आणि निदा खान या तिघांविरुद्ध बलात्कार, फसवणूक आणि धार्मिक भावना दुखावल्याप्रकरणी गुन्हे नोंदवण्यात आले आहेत. पीडितेचे मूळ नाव तिच्या धार्मिक ओळखीसाठी महत्त्वाचे असतानाही, संशयितांनी तिचा बुद्धीभेद करून तिला ‘हानिया’ हे नाव धारण करण्यास भाग पाडले होते, असेही पोलीस तपासात उघड झाले आहे.
या प्रकरणातील राजकीय धागेदोरे देखील आता समोर येत आहेत. संशयित निदा खान ही जेव्हा पोलिसांपासून लपून फिरत होती, तेव्हा तिला आश्रय दिल्याचा आरोप छत्रपती संभाजीनगरमधील ‘एमआयएम’चा माजी नगरसेवक मतीन पटेल याच्यावर ठेवण्यात आला आहे. पोलिसांनी मतीन पटेल याला या गुन्ह्यात सहसंशयित केले असून, त्याला आजच नाशिक पोलिसांसमोर समक्ष हजर राहण्याचे आदेश देण्यात आले आहेत. निदा खान हिच्या जामीन अर्जावरही आजच न्यायालयात महत्त्वपूर्ण युक्तिवाद होणार असल्याने या निकालाकडे सर्वांचे लक्ष लागले आहे. आरोपींनी रचलेल्या या व्यूहरचनेमुळे पीडितेच्या मानसिक स्थितीवरही मोठा परिणाम झाला होता, ज्याचा फायदा घेत तिचे धर्मांतर करण्याचा प्रयत्न झाला होता.
नाशिकचे पोलीस आयुक्त संदीप कर्णिक यांनी या प्रकरणाचे गांभीर्य ओळखून सहाय्यक पोलीस आयुक्त संदीप मिटके यांच्या नेतृत्वाखाली विशेष तपास पथकाची स्थापना केली होती. संशयित निदाचे तिच्या पतीसोबत झालेले चॅटिंग हा या खटल्यातील सर्वात भक्कम पुरावा मानला जात आहे.
