South Superstar Affair Rumors : दाक्षिणात्य चित्रपटसृष्टीतील दिग्गज कलाकारांचे वैयक्तिक आयुष्य सध्या प्रसारमाध्यमांमध्ये चर्चेचा केंद्रबिंदू ठरत आहे. अभिनयाचा पडदा सोडून राजकारणात प्रवेश केलेले आणि तामिळनाडूच्या मुख्यमंत्रीपदी विराजमान झालेले थलपती विजय यांच्या कौटुंबिक वादाची चर्चा अद्याप शमलेली नाही, तोच आता १८०० कोटींची कमाई करणाऱ्या ‘पुष्पा’ फेम सुपरस्टार अल्लू अर्जुनच्या अफेअरच्या अफवांनी खळबळ उडाली आहे.
विजय आणि तृषा कृष्णन यांच्या नात्याची चर्चा
गेल्या काही काळापासून थलपती विजय यांचे वैयक्तिक आयुष्य वादळाच्या तडाख्यात सापडले आहे. त्यांच्या पत्नीने घटस्फोटासाठी अर्ज दाखल केल्याचे वृत्त असून, त्यांनी विजय यांच्यावर एका अभिनेत्रीसोबत असलेल्या विवाहबाह्य संबंधांचे आरोप केल्याचे समजते. विशेषतः थलपती विजय यांच्या मुख्यमंत्रिपदाच्या शपथविधी सोहळ्यात अभिनेत्री तृषा कृष्णन हिची लक्षवेधी उपस्थिती आणि दोघांचे वारंवार एकत्र दिसणे, यामुळे त्यांच्या नात्याबद्दलच्या चर्चांना अधिक बळकटी मिळाली आहे.
अल्लू अर्जुन आणि सीरत कपूर यांच्या अफेअरच्या अफवा
या सर्व घडामोडींच्या पार्श्वभूमीवर आता सुपरस्टार अल्लू अर्जुन याचे नाव अभिनेत्री सीरत कपूर हिच्याशी जोडले जात आहे. या चर्चांना सुरुवात झाली ती ८ एप्रिल रोजी, जेव्हा अल्लू अर्जुनच्या ४४ व्या वाढदिवसानिमित्त सीरतने काही फोटो सोशल मीडियावर प्रसारित केले. अल्लू अर्जुनच्या खाजगी विमानातील (Private Jet) या छायाचित्रांमुळे चाहत्यांच्या भुवया उंचावल्या आहेत. या फोटोंवर नेटकऱ्यांनी मोठ्या प्रमाणात पसंती दर्शवली असली, तरी काहींनी मात्र अत्यंत खालच्या थराच्या कमेंट्स करत या कलाकारांना ट्रोल करण्याचा प्रयत्न केला.
ट्रोलरला सीरत कपूरचे सडेतोड उत्तर
नुकताच सीरत कपूरने सोशल मीडियावर स्वतःचा एक फोटो शेअर केला होता, ज्यावर एका युजरने “अल्लू अर्जुनची मालमत्ता” (Allu Arjun ki Property) अशी आक्षेपार्ह टिप्पणी केली. सहसा कलाकार अशा गोष्टींकडे दुर्लक्ष करतात, मात्र सीरतने या ट्रोलरला अत्यंत सुसंस्कृत आणि जहाल भाषेत उत्तर देत त्याची बोलती बंद केली. सीरतने म्हटले की, “केवळ हार्ट इमोजी जोडल्याने तुमची टिप्पणी आदरयुक्त होत नाही. कोणतीही स्त्री ही कोणाची मालमत्ता नसते. तिचे स्वतःचे स्वतंत्र अस्तित्व, स्वप्ने आणि तिचा स्वतःचा आवाज असतो. कौतुक जरूर करा, पण मालकी हक्क गाजवण्याचा प्रयत्न करू नका.”
कोण आहे सीरत कपूर?
सीरत कपूर ही एक बहुआयामी भारतीय अभिनेत्री, मॉडेल आणि कोरिओग्राफर आहे. २०१४ मध्ये ‘रन राजा रन’ या तेलुगू चित्रपटातून तिने आपल्या अभिनय कारकिर्दीची यशस्वी सुरुवात केली होती. त्यानंतर तिने ‘जिद’ या हिंदी चित्रपटातही काम केले. अलीकडच्या काळात ‘सेव्ह द टायगर्स’ ही वेब सिरीज आणि ‘भामाकलापम २’ या चित्रपटातील तिच्या भूमिकेचे विशेष कौतुक झाले आहे.
