Lohagad Fort Murder Case: पुणे जिल्ह्यातील ऐतिहासिक आणि पर्यटकांचे आवडते ठिकाण असलेला लोहगड किल्ला गेल्या दोन आठवड्यांपासून एका धक्कादायक गुन्हेगारी प्रकरणामुळे चर्चेत आला आहे. लोहगड किल्ल्यावर घडलेल्या केतन अग्रवाल हत्या प्रकरणाचा तपास आता अधिक तीव्र झाला आहे. या तपासाचाच एक भाग म्हणून आणि खबरदारीचा उपाय म्हणून पोलिसांनी किल्ल्यावरील एका विशिष्ट भागामध्ये पर्यटकांच्या प्रवेशावर पूर्णपणे बंदी घातली आहे.
एएनआय (ANI) या वृत्तसंस्थेने दिलेल्या माहितीनुसार, ज्या ठिकाणाहून केतनला खाली ढकलण्यात आल्याचा आरोप आहे, तो परिसर पोलिसांनी गुन्ह्याचा तपास पूर्ण होईपर्यंत पूर्णपणे सील केला आहे. पावसाळ्याच्या दिवसांत लोहगडावर पर्यटकांची मोठी गर्दी होत असल्याने कोणताही अनुचित प्रकार घडू नये आणि पुरावे नष्ट होऊ नयेत म्हणून हा निर्णय घेण्यात आला आहे.
नेमके काय आहे हे संपूर्ण प्रकरण?
लोहगड किल्ल्याच्या कड्यावरून खाली कोसळल्यामुळे केतन अग्रवाल या तरुणाचा मृत्यू झाला होता. मात्र, हा अपघात नसून घातपात असल्याचा आरोप करण्यात आला आहे. या प्रकरणात पोलिसांकडे उपलब्ध झालेल्या प्राथमिक माहितीनुसार:
- घटनेची तारीख: ही धक्कादायक घटना 18 जून रोजी लोहगड किल्ल्यावर घडली होती.
- हत्येचा आरोप: आरोपी तरुणी सिया गोयल हिने लोहगड किल्ल्यावरून केतन अग्रवालला धक्का देऊन दरीत ढकलले आणि त्याची हत्या केली, असा आरोप तिच्यावर ठेवण्यात आला आहे.
- प्रियकराची साथ: या संपूर्ण कटात आणि हत्येच्या गुन्ह्यात सियाला तिचा प्रियकर चेतन चौधरी याने पूर्ण साथ दिली असल्याचा आरोप पोलिसांच्या एफआयआरमध्ये करण्यात आला आहे.
आरोपींच्या पोलीस कोठडीत वाढ; कसून चौकशी सुरू
केतन अग्रवालच्या मृत्यूनंतर पुणे ग्रामीण पोलिसांनी वेगाने चक्र फिरवत मुख्य संशयित आरोपी सिया गोयल आणि तिचा प्रियकर चेतन चौधरी या दोघांना 23 जून रोजी अधिकृतपणे अटक केली होती.
न्यायालयात हजर केले असता सुरुवातीला त्यांना पोलीस कोठडी सुनावण्यात आली होती. आता या प्रकरणाचा गुंता सोडवण्यासाठी आणि हत्येमागील मुख्य कारणाचा शोध घेण्यासाठी पोलिसांनी कोर्टाकडे आणखी मुदत मागितली होती. त्यानुसार, न्यायालयाने या दोन्ही आरोपींच्या पोलीस कोठडीत 3 जुलैपर्यंत वाढ केली आहे. पोलीस सध्या घटनास्थळाची पाहणी आणि आरोपींची समोरासमोर चौकशी करत आहेत.
