Monsoon Travel Destinations India: भारतातील पावसाळा खरोखरच जादूई असतो. हा वर्षाचा असा काळ आहे जेव्हा थंडगार वारे आणि आल्हाददायक हवामान पर्यटकांचे स्वागत करते. कोसळणाऱ्या पावसाच्या सरींमुळे धबधबे वेगाने वाहू लागतात, टेकड्यांवर हिरवीगार शाल पसरते आणि आकाशात कापसासारखे पांढरे ढग दाटून येतात. पावसाच्या पहिल्या थेंबासोबत मातीचा येणारा तो सुगंध मनाला एक वेगळीच शांतता देऊन जातो.
अनेक जण पावसाळ्यात प्रवास करणे टाळतात, पण या दिवसांत निसर्गाचे जे रूप पाहायला मिळते, ते इतर कोणत्याही ऋतूत पाहायला मिळत नाही. त्यामुळे घराच्या चार भिंतींमध्ये कोंडून न राहता, या पावसाळ्यात बॅग पॅक करा आणि देशातील काही अप्रतिम ठिकाणांना भेट द्या. तुमच्या सोयीसाठी आम्ही भारतातील सर्वात सुंदर अशा ५ पर्यटन स्थळांची यादी तयार केली आहे.
१. चेरापुंजी (मेघालय)
देशात सर्वाधिक पाऊस पडणारे ठिकाण म्हणून चेरापुंजी जगभर प्रसिद्ध आहे. येथे वर्षभर पाऊस पडत असला, तरी मान्सूनच्या काळात येथील सौंदर्य कैक पटीने वाढते. मुसळधार पाऊस आणि थंड वाऱ्याच्या झुळकीत बसून गरम चहाचा आस्वाद घेणे, हा एक अविस्मरणीय अनुभव असतो. निसर्गप्रेमींसाठी हे ठिकाण म्हणजे पृथ्वीवरील स्वर्गच आहे.
- जवळचा विमानतळ: गुवाहाटी विमानतळ
- पावसाळ्यातील सरासरी तापमान: 12-16℃
२. लोणावळा (महाराष्ट्र)
महाराष्ट्रातील पर्यटकांसाठी पावसाळ्यात लोणावळ्यापेक्षा उत्तम जागा दुसरी कोणतीही असू शकत नाही. या दिवसांत लोणावळा अत्यंत रोमँटिक आणि विहंगम दिसते. टायगर्स पॉईंटवरून दिसणारी धुक्याची चादर, ओसंडून वाहणारे तुंगार्ली तलाव आणि पावसाच्या थेंबांनी न्हाऊन निघालेला तिकोना किल्ला पाहण्यासाठी येथे पर्यटकांची मोठी गर्दी होते.
- जवळचा विमानतळ: लोहेगाव विमानतळ (पुणे)
- पावसाळ्यातील सरासरी तापमान: 22-26℃
३. माऊंट अबू (राजस्थान)
वाळवंटाचा प्रदेश असलेल्या राजस्थानमधील माऊंट अबू हे एकमेव थंड हवेचे ठिकाण आहे. येथील आल्हाददायक हवामानामुळे देश-विदेशातून पर्यटक येथे येतात. पावसाळ्यात या ठिकाणचे सौंदर्य अधिकच खुलते. येथे आल्यानंतर दिलवाडा मंदिर, नकी तलाव आणि टॉड रॉक यांसारख्या प्रसिद्ध ठिकाणांना आवर्जून भेट दिली पाहिजे.
- जवळचा विमानतळ: दाबोक विमानतळ
- पावसाळ्यातील सरासरी तापमान: 22-30℃
४. वायनाड (केरळ)
दक्षिण भारताचा निसर्ग अनुभवण्यासाठी केरळमधील वायनाड हे एक उत्तम ठिकाण आहे. पावसाळ्यात येथे ‘स्प्लॅश’ नावाचा ३ दिवसांचा खास मान्सून फेस्टिव्हल आयोजित केला जातो. येथील विस्तीर्ण चहाचे मळे, हिरवेगार डोंगर आणि ट्रेकिंगची आवड असणाऱ्यांसाठी वायनाड हा एक उत्तम पर्याय आहे.
- जवळचा विमानतळ: कालिकत आंतरराष्ट्रीय विमानतळ
- पावसाळ्यातील सरासरी तापमान: 24-31℃
५. दार्जिलिंग (पश्चिम बंगाल)
‘हिमालायाची राणी’ म्हणून ओळखल्या जाणाऱ्या दार्जिलिंगचे सौंदर्य पर्यटकांना भुरळ पाडणारे आहे. समुद्रसपाटीपासून 2,050 मीटर उंचीवर वसलेले हे हिल स्टेशन चहाच्या बागा, सुंदर दऱ्या आणि ऐतिहासिक टॉय ट्रेनसाठी प्रसिद्ध आहे. पावसाळ्यात येथील हिरवळ अधिक गडद होते. येथील जगप्रसिद्ध दार्जिलिंग चहाची चव घेतल्याशिवाय तुमची ट्रिप अपूर्ण राहील.
पावसाळ्यातील सरासरी तापमान: 12-19℃
जवळचे विमानतळ: बागडोगरा विमानतळ
हे देखील वाचा – Abhishek Banerjee Attacked: “शासकच बनले मारेकरी!”; पुतण्यावर झालेल्या हल्ल्यानंतर ममता बॅनर्जींचा भाजप सरकारवर हल्लाबोल
