AC Side Effects: भारतात सध्या सूर्याचा आगडोंब पाहायला मिळत असून देशातील अनेक शहरांचे तापमान 40 अंश सेल्सिअसच्या पुढे गेले आहे. या कडाक्याच्या उन्हापासून वाचण्यासाठी जास्तीत जास्त लोक घरामध्ये एअर कंडिशनिंगचा (AC) वापर करत आहेत. एसीमुळे उष्णतेपासून त्वरित आराम मिळत असला, तरी त्याचा अतिवापर शरीरासाठी घातक ठरू शकतो, असा इशारा आरोग्य तज्ज्ञांनी दिला आहे.
AC Side Effects: एसीचा अतिवापर आणि ‘सिक बिल्डिंग सिंड्रोम’
जेव्हा आपण बराच वेळ एसी असलेल्या बंद खोलीत राहतो, तेव्हा आपल्याला ‘सिक बिल्डिंग सिंड्रोम’चा त्रास होऊ शकतो. यामध्ये डोकेदुखी, चक्कर येणे, सतत खोकला येणे, नाक वाहणे आणि कामावर लक्ष केंद्रित करण्यास अडचण येणे यांसारखी लक्षणे दिसतात. विशेष म्हणजे, एसी असलेल्या खोलीतून बाहेर पडल्यावर ही लक्षणे आपोआप कमी होऊ लागतात.
AC Side Effects: श्वसनसंस्था आणि त्वचेवर होणारे परिणाम
एसीमधील हवा कोरडी असते, ज्यामध्ये आर्द्रतेचा अभाव असतो. यामुळे शरीरातील ओलावा कमी होऊन त्वचा कोरडी पडते आणि खाज सुटते. ज्यांना आधीच सोरायसिससारखे आजार आहेत, त्यांचा त्रास वाढू शकतो. याशिवाय, कोरड्या हवेमुळे घसा खवखवणे आणि नाक चोंदणे यांसारख्या समस्या उद्भवतात. डोळ्यांतील ओलावा कमी झाल्याने डोळे लाल होणे किंवा खाज येण्याचाही त्रास होतो.
AC Side Effects: तापमानाचा धक्का
उन्हातून आल्यावर लगेच एसी सुरू करणे किंवा थंड खोलीतून लगेच कडक उन्हात जाणे शरीरासाठी धोकादायक आहे. यामुळे रक्तवाहिन्या अचानक आकुंचन पावतात, ज्यामुळे रक्तदाब (Blood Pressure) वाढू शकतो. ज्यांना हृदयविकार किंवा हाय बीपीचा त्रास आहे, त्यांच्यासाठी हा ‘टेम्परेचर शॉक’ जीवघेणा ठरू शकतो.
आरोग्यदायी एसी वापरासाठी काही खास टिप्स:
एसी वापरणे पूर्णपणे बंद करण्याची गरज नाही, पण काही खबरदारी घेतल्यास आरोग्य जपता येईल:
- नियमित सर्व्हिसिंग: एसीचे फिल्टर्स वेळोवेळी स्वच्छ करा, जेणेकरून बॅक्टेरिया वाढणार नाहीत.
- तापमान नियंत्रित ठेवा: एसीचे तापमान 24 ते 26 अंश सेल्सिअस दरम्यान ठेवणे शरीरासाठी योग्य आहे.
- पाणी भरपूर प्या: एसीमध्ये तहान लागत नाही, तरीही शरीरातील पाणी कमी होऊ नये म्हणून पाणी पीत राहा.
- ब्रेक घ्या: सतत एसीमध्ये बसण्यापेक्षा मध्येच थोडा वेळ नैसर्गिक हवेत जा.
उन्हाळ्यापासून वाचण्यासाठी एसी नक्कीच गरजेचा आहे, पण त्याचा वापर करताना आरोग्याकडे दुर्लक्ष करू नका.
हे देखील वाचा –
