SRPF Exam Cancelled: महाराष्ट्र पोलीस भरती प्रक्रियेतून एक अत्यंत महत्त्वाची आणि मोठी बातमी समोर आली आहे. राज्य राखीव पोलीस दलाच्या (SRPF) गट क्रमांक 5, दौंड येथील सशस्त्र पोलीस शिपाई पदासाठी झालेली लेखी परीक्षा प्रशासनाने अखेर पूर्णपणे रद्द केली आहे.
या परीक्षेच्या प्रश्नपत्रिकेबाबत गंभीर आक्षेप घेण्यात आले होते, ज्याची दखल घेत अप्पर पोलीस महासंचालकांनी हा मोठा निर्णय घेतला आहे. आता या पदासाठी २४ मे 2026 रोजी पुन्हा नव्याने लेखी परीक्षा घेतली जाणार असल्याची माहिती वरिष्ठ सूत्रांनी दिली आहे.
ही नवीन परीक्षा दत्तकला शिक्षण संस्था, स्वामी चिंचोळी, दौंड या केंद्रावर पार पडणार आहे. माध्यम समूहांनी या संपूर्ण प्रकरणाचा सातत्याने पाठपुरावा केल्यानंतर सुरुवातीला ही प्रक्रिया स्थगित करण्यात आली होती, मात्र आता ती परीक्षाच अधिकृतपणे रद्द करण्याचा निर्णय घेण्यात आला आहे.
नेमका काय होता वाद?
- खासगी पुस्तकातून प्रश्न: २ मे 2026 रोजी या भरतीची लेखी परीक्षा घेण्यात आली होती. मात्र, या प्रश्नपत्रिकेतील 100 पैकी तब्बल 85 प्रश्न हे एका खासगी प्रकाशन संस्थेच्या ‘पोलीस भरती प्रश्नपत्रिका सराव प्रश्नसंच 10’ या पुस्तकातून जसेच्या तसे विचारण्यात आल्याचा खळबळजनक आरोप झाला.
- उमेदवारांमध्ये संताप: एकाच पुस्तकातून एवढ्या मोठ्या प्रमाणावर प्रश्न आल्यामुळे भरती प्रक्रियेच्या पारदर्शकतेवर प्रश्नचिन्ह उपस्थित झाले होते. या प्रकारामुळे प्रामाणिकपणे अभ्यास करणाऱ्या उमेदवारांमध्ये प्रचंड संतापाची लाट पसरली होती, तसेच विरोधी पक्षांनीही या प्रकरणी उच्चस्तरीय चौकशीची मागणी लावून धरली होती.
उच्चस्तरीय चौकशीचे आदेश आणि पुढील कारवाई
हा गैरप्रकार उघडकीस आल्यानंतर पुणे येथील राज्य राखीव पोलीस दलाच्या पोलीस उपमहानिरीक्षकांनी ४ मे रोजी या प्रकरणाच्या सखोल चौकशीचे आदेश दिले होते. चौकशीचा प्राथमिक अहवाल समोर येईपर्यंत संपूर्ण भरती प्रक्रिया थांबवण्यात आली होती. अखेर उमेदवारांवर अन्याय होऊ नये म्हणून जुनी परीक्षा रद्द करून पुनर्परीक्षा घेण्याचा निर्णय वरिष्ठ पातळीवर घेण्यात आला.
एसआरपीएफ प्रशासनाने प्रसिद्ध केलेल्या अधिकृत निवेदनात म्हटले आहे की, माध्यमांमधून आणि उमेदवारांकडून आलेल्या तक्रारींची विभागाने अत्यंत गंभीर दखल घेतली आहे. या प्रकरणाचा अंतिम चौकशी अहवाल प्राप्त झाल्यानंतर दोषींवर योग्य ती कडक कायदेशीर कार्यवाही केली जाईल.
नवीन परीक्षेचे वेळापत्रक
- सुधारित तारीख: २४ मे 2026
- परीक्षा केंद्र: दत्तकला शिक्षण संस्था, स्वामी चिंचोळी, दौंड
या पुनर्परीक्षेमुळे सर्व पात्र उमेदवारांना समान संधी मिळेल आणि पोलीस भरती प्रक्रियेवरील जनतेचा विश्वास पुन्हा दृढ होईल, असा विश्वास प्रशासनाने व्यक्त केला आहे.
हे देखील वाचा – Fuel Price Hike: सर्वसामान्यांना महागाईचा मोठा फटका! 5 दिवसातच पेट्रोल-डिझेलच्या किमतीत पुन्हा वाढ
